Андижонда Қирғизистондан машина ўриндиғи остида 4400 долларлик гашиш олиб ўтаётган фуқаро қўлга олинди

Олдиндан бир гуруҳ шахслар билан ўзаро жиноий тил бириктириб, гиёҳвандлик воситаларини кўп миқдорда қонунга хилоф равишда сотишга суиқасд қилиш каби ўта оғир жиноятларни қасддан содир этган андижонлик Н.А.га нисбатан суд ҳукми ўқилди. Бу ҳақда «Дарё» мухбири Миролим Исажонов хабар бермоқда.

Давлат хавфсизлик хизмати Андижон вилоят бошқармаси ходимлари томонидан олиб борилган тезкор тадбир давомида фуқаро Н.А. осонгина пул топишни кўзлаб, гиёҳванд моддалар олди-сотдиси билан шуғулланаётган пайтда қўлга олинган эди. У Қирғизистон Республикасидан 4400 АҚШ доллар эвазига 1003,59 грамм миқдордаги гашиш гиёҳвандлик моддасини ўзининг бошқарувидаги Nexia автомашинасининг ҳайдовчи ўриндиғи остига яшириб, олиб кетаётганида бу жиноятга барҳам берилганди.

Содир этилган мазкур жиноий ҳолат юзасидан Ўзбекистон Республикаси Жиноят Кодексининг тегишли моддалари бўйича жиноий иш қўзғатилиб, Жиноят ишлари бўйича Хўжаобод туман суди томонидан кўриб чиқилди ва суд ҳукми ўқилди.

Муқаддам судланиб, ўзига тегишли хулоса чиқармаган 35 ёшли А.Н. яна умрининг энг навқирон даврини панжара ортида ўтказадиган бўлди.