Тошкентликлар 11 ой давомида Ўзбекистон аҳолисининг ўртача кўрсаткичига нисбатан уч баробар кўп пул сарфлади

Ўзбекистонда 2018 йилнинг январь ноябрь ойларида бир киши учун чакана савдо айланмаси ўртача 3,54 миллион сўмни ташкил этди. Бунда пойтахт аҳолиси харажатлари уч баробар кўп – 10,5 миллион сўм. Бу ҳақда Turon24 Давлат статистика қўмитаси ҳисоботига таяниб хабар бермоқда.

Юқори кўрсаткич Навоий (4,9 млн сўм) ва Тошкент (4,3 млн сўм) вилоятларида ҳам қайд этилди.

Давлат статистика қўмитаси харажатларнинг бундай тақсимланишини йирик савдо ва саноат корхоналарининг ҳудудий жойлашуви билан изоҳлади.

Харажатларнинг энг кам кўрсаткичи Қорақалпоғистонда кузатилган. Бу ерда бир кишига 2,04 миллион сўм тўғри келади.

Мамлакатда 2018 йилнинг январь ноябрь ойларида чакана савдо айланмаси 116,7 триллион сўмга тенг бўлди (17 декабрдаги курс бўйича 14,04 млрд доллар). Бунда кичик тадбиркорликнинг улуши умумий савдо айланмасининг 86,5 фоизини ташкил этди – 100,9 трлн сўм (12,1 млрд доллар).