Ўзбекистонда хизмат кўрсатган артист, таниқли сўз устаси Обид Асомов 14 декабрь куни Тошкентдаги 1-шаҳар клиник шифохонасида вафот этди. Бу ҳақда Соғлиқни сақлаш вазирлиги ахборот хизмати маълум қилди. У 55 ёшда эди.
Бир неча кун муқаддам Обид Асомов юрак хуружи билан касалхонага ётқизилгани ҳақида хабарлар берилган эди.
Қизиқчи ва актёр Обид Асомов 1963 йилда Тошкентнинг Чилонзор туманида туғилган. Тошкент театр ва рассомчилик институтида таҳсил олган, 1993 йилда эса «Обид-А» театрига асос солган.
«Кулол ва хурмача», «Альпомиш», «Дев ва пакана», «Тоҳир ва Зуҳра (замонавий талқин)» каби фильмларда суратга тушган. 2000 йиллар охиридан бошлаб россиялик таниқли юморист Евгений Петросяннинг таклифига кўра, «Кривое зеркало» телешоусида қатнашди.
Обид Асомов 2018 йилнинг 24 майида «Ўзбекфильм» ҳузуридаги «Мультипликацион фильмлар студияси» директори этиб тайинланган эди. Сўнгги вақтларда Instagram’даги саҳифаси орқали студиянинг янги маҳсулоти — «Довюрак ошпаз» мультфильмини овозлаштириш жараёнидан лавҳалар қўйиб бораётган эди.
Изоҳ (0)