Мажбурий ижро бюросининг Самарқанд вилоят бошқармаси томонидан фуқаро М.А. нинг аризаси бўйича текшириш ўтказилди. Бу ҳақда Мажбурий ижро бюроси матбуот хизмати «Дарё»га хабар берди.
Самарқанд шаҳар электр таъминоти корхонаси ходими И.М. Вазирлар Маҳкамасининг 2018 йил 12 январдаги 22-сонли қарорининг 1-иловаси 51-банди талабларига кўра «Истеъмолчиларнинг Электр энергиясини ҳисобга олиш асбоблари, шунингдек электр энергиясини ҳисобга олишнинг бошқа воситалари истеъмолчиларнинг маблағлари ҳисобига сотиб олинади, давлат қиёсловидан ўтказилади, ҳудудий электр тармоқлари корхоналари томонидан Бюро билан ҳамкорликда бепул ўрнатилади, пломбаланади ва рўйхатдан ўтказилиши» ҳақидаги қоидани била туриб, алдаш ва ишончни суиистеъмол қилиш йўли билан ўзганинг мулкини қўлга киритишни мақсад қилган.
И.М. Самарқанд шаҳридаги жойлашган хусусий корхонада иш бошқарувчи М.А. дан «жаримани камайтириш, ҳисобга олиш приборини алмаштириш хизмат ҳақи ва дастурга киритиб бериш» шарти билан 800 минг сўм пулларини фирибгарлик йўли билан алдаб қўлга киритган. Сўнг инсофи уйғониб, пулни қайтариб берган вақтида ашёвий далиллар билан расмийлаштирилган.
Мазкур ҳолат юзасидан Самарқанд вилоят бошқармаси томонидан И.М. га нисбатан Ўзбекистон Республикаси Жиноят Кодексининг 168-моддаси (фирибгарлик) 1-қисми билан жиноят иши қўзғатилиб, вилоят прокуратурасига юборилган.
Шунингдек, Мажбурий ижро бюросининг Самарқанд вилоят бошқармаси ва Булунғур туман бўлими ходимлари томонидан фуқаро И.Анинг аризаси юзасидан ўтказилган тезкор тадбир ўтказилди.
Унда электр таъминоти корхонасининг ходими Ф.Т. И.А.нинг яшаш уйида ўрнатилган янги электр ҳисоблагични электр таъминоти корхонасининг маълумотлар базасига киритиб бериш эвазига 200 минг сўм пулларни фирибгарлик йўли билан олган вақтда ашёвий далиллар билан ушланиб, тегишли тартибда расмийлаштирилган.
Мазкур ҳолат юзасидан Булунғур туман бўлими томонидан электр таъминоти корхонасининг ходими Ф.Тга нисбатан Ўзбекистон Республикаси Жиноят Кодексининг 168-моддаси (фирибгарлик) 1-қисми билан жиноят иши қўзғатилиб, Булунғур туман прокуратурасига юборилган.
Изоҳ (0)