Бухоро вилояти Қоракўл туманида яшовчи фуқаро А.Омонов яшаш хонадонида электр тармоғига ўзбошимчалик билан уланиб, ноқонуний фойдаланиб келган, деб хабар берди Бухоро вилояти жиноят ишлари бўйича суди матбуот хизмати.
Бу қонунбузарлик Мажбурий ижро бюроси Қоракўл туман бўлими ходимлари томонидан аниқланиб, тегишли ҳужжатлар расмийлаштирилаётган пайтда ака-ука Омоновлар ҳокимият вакилларининг қонуний фаолиятига қаршилик кўрсатиб, фуқаро А.Омонов МИБ ходимларини уриб, тан жароҳати етказади. Ш.Омонов эса уларни ҳақорат қилади.
Оила бюджетига ноқонуний йўл билан фойда келтирмоқчи бўлиб, давлатга зарар етказган ва буни хаспўшлаш йўлида жиноят йўлига кирган ака-ука Омоновлар Жиноят ишлари бўйича Қоракўл туман суди томонидан Ўзбекистон Республикаси Жиноят кодексининг 219-моддаси (ҳокимият вакилига қаршилик кўрсатиш) ва 140-моддалари (ҳақорат қилиш) билан айбдор деб топилиб, 2018 йил 29 ноябрь кунидаги суд ҳукмига кўра фуқаро А.Омонов 2 йил, фуқаро Ш.Омонов эса 1 йилу 6 ой муддатга ҳар ойлик иш ҳақининг 20 % ни давлат даромади ҳисобига ундириш шарти билан ахлоқ тузатиш ишлари жазосига ҳукм этилди.
Изоҳ (0)