Ўзбекистон ёшлар иттифоқи Марказий кенгаши биносиба Иттифоқ бошланғич ташкилот етакчилари ва йўналиш сардорларининг 2018 йил якунларига оид видеоселектор ҳисобот йиғилиши бўлиб ўтди. Бу ҳақда Мудофаа вазирлиги матбуот хизмати «Дарё»га маълум қилди.
Унда Мудофаа вазирлигига қарашли ҳарбий қисм ва муассасалардаги барча етакчилар ва йўналиш сардорлари, вилоят кенгашлари Ёшлар иттифоқи раислари ҳамда ҳарбий қисмлар бўйича бўлим мудирлари иштирок этди.
Мудофаа вазирлиги Ёшлар иттифоқи бошланғич ташкилот етакчиси подполковник Сардор Абдусаматов Мудофаа вазирлиги қўшинларида Ўзбекистон Президентининг 2017 йил 17 ноябрдаги «Ўзбекистон Республикаси Қуролли Кучларида ёшларга оид давлат сиёсати самарадорлигини янада ошириш бўйича қўшимча чора-тадбирлар тўғрисида»ги қарори асосида ишлаб чиқилган норматив-ҳуқуқий ҳужжатлар ва 2018 йилда амалга оширилган ишлар тўғрисида ҳисоботини етказди. Ўтказилган таҳлил натижаларига кўра, жойларда ҳамон камчиликлар мавжуд, уларни бартараф этиш чоралари, келгусида амалга оширилиши лозим бўлган ишлар тўғрисида аниқ тавсиялар берди.
Йиғилишда ёш ҳарбий хизматчилар билан очиқ мулоқотлар ташкил этиш, ҳарбий қисмда учраётган ёшлар муаммоларини ўрганиб, уларнинг ечими бўйича юқори қўмондонликка таклифлар киритишдаги камчиликлар ҳам сарҳисоб қилинди.
Шундан сўнг, Мудофаа вазирлиги Ёшлар иттифоқи бошланғич ташкилоти ходимлари бир гуруҳ ёшлар билан Қуролли Кучлар давлат музейида ҳам учрашув ўтказди. Унда ёшларни ҳарбий-ватанпарварлик руҳида тарбиялаш, уларда Ватанга бўлган садоқат ҳиссини шакллантириш йўлида амалга оширилаётган ишлар муҳокама қилинди. Тадбир якунида музей бўйлаб экскурсия ташкил этилди.
Изоҳ (0)