Термизда Корея маданияти кунлари бошланди

Термиз шаҳрида Корея маданияти кунлари бошланди. Бу ҳақда «Turon 24» маълум қилди.

Шу муносабат билан Термиз шаҳридаги «Ёшлар маркази»да Корея кино фестивалининг очилиш маросими бўлиб ўтди.

Маданият кунлари доирасида кинофестиваль, қўшма ҳамкорликдаги концерт, турли ижодий учрашув ва маданий мулоқотлар ўтказилиши кўзда тутилган.

Жумладан:

«Еттинчи камерадаги мўъжиза», «Ғаройиб туш», «Фақат сен» номли Корея фильмлари намойиши;

Термиз санъат саройида Koryo рақс ансамбли ҳамда «Бойсун» фолклор-этнографик халқ ансамбли ижросида қўшма концертлар ўтказилади.

Шунингдек, Корея Республикасининг Ўзбекистондаги элчихонаси ва «Koryo» рақс ансамбли аъзоларининг Термиз археология музейи, Термиз туманидаги Фаёзтепа, Қоратепа, Қирқ қиз ва Султон Саодат сингари қадимий ёдгорликлар, Шеробод туманидаги Хўжаикон туз кони, Бойсун туманидаги шифобахш хусусиятга эга Хўжа Майхона булоғига саёҳати ҳам режаланган.

Мазкур тадбир Сурхондарё вилояти ҳокимлиги ва Корея Республикасининг Ўзбекистондаги элчихонаси ҳамкорлигида ташкил этилмоқда.