Тошкентда 2018 йил январида «Самара—Чимкент» йўлида ёниб кетган ва 52 ўзбекистонликнинг ўлимига сабабчи бўлган автобус эгаси ҳисобланган Қозоғистон фуқароси қўлга олинди. Бу ҳақда Тошкент шаҳар ИИББ матбуот хизмати хабар берди.
ИИББнинг қайд этишича, 46 ёшли О.М. ҳуқуқни муҳофаза қилувчи органлар чақирувига жавоб бермай, терговдан қочиб юрган. У Қозоғистонда Жиноят кодексининг 348-моддаси 4-қисмида назарда тутилган жиноятни («транспорт воситаларини сифатсиз таъмирлаш ёки уларни техник носоз ҳолда фойдаланишга чиқариш») содир этганликда айбланмоқда.
Хабар беришларича, давлатлараро қидирувда бўлган О.М. 20 ноябрь куни Тошкент шаҳрининг Сергели туманида ўтказилган қўшма тезкор-қидирув тадбирлари вақтида қўлга олинган. Уни экстрадиция қилиш ҳақидаги масала ҳал этилгунига қадар 22 ноябрдан бошлаб Ўзбекистон ИИВнинг Жазони ижро этиш бош бошқармаси муассасасига жойлаштирилган.
«Қўлга олинган шахсни Қозоғистон ҳуқуқни муҳофаза қилиш органларига топшириш жараёни икки давлат ўртасидаги халқаро ҳуқуқий келишувларга мувофиқ амалга оширилади», — дейилади ИИББ ахборотида.
Эслатиб ўтамиз, 2018 йил январь ойида Қозоғистоннинг Ақтўбе вилоятида ўзбекистонликларни олиб кетаётган автобус ёниб кетган эди. Ҳодиса оқибатида 52 ўзбекистонлик ҳалок бўлган, икки ўзбекистонлик йўловчи ва уч қозоғистонлик ҳайдовчи омон қолган.
Ноябрь ойида ушбу иш бўйича беш гумонланувчи (хусусан, ёнган автобуснинг уч ҳайдовчиси)га нисбатан суд ҳукмлари эълон қилинди. Уч ҳайдовчининг ҳар бири беш йил муддатга озодликдан маҳрум этилди. Ўз навбатида уларга ҳалок бўлган 52 ўзбекистонликнинг ҳар бирининг оила аъзоларига 2 миллион тенгедан товон пули тўлаш мажбурияти юклатилган.
Ўшанда автобуснинг ҳақиқий эгаси халқаро қидирувда экани айтилган эди.
Изоҳ (0)