Иқтисодиёт вазирлиги ҳайдовчиларга гувоҳнома ва сертификатларни бериш вазифасини Ички ишлар вазирлигидан олиб, хусусий секторга бериш ҳақида таклиф киритмоқда. Бу ҳақда муҳокама порталидаги «Иқтисодиётда давлат аралашувини янада чеклаш тўғрисида»ги Президент қарори лойиҳасида келтирилган, дея хабар беради «Turon 24».
Ҳозир ҳайдовчилик гувоҳномаси ЙҲХБнинг рўйхатдан ўтказиш ва имтиҳон олиш бўлинмалари томонидан берилади. Агарда бу вазифани хусусий тадбиркорлар бажарадиган бўлса, Ички ишлар вазирлиги уларни аккредитациядан ўтказиш орқали назорат қилади.
Автомобильларни эгасининг пропискадан ўтган жойига ҳисобга қўйиш ҳам ИИВдан олиниб, хусусий тадбиркорларга берилиши режаланган. Бу ҳолатда ҳам ИИВ ушбу хизмат турини кўрсатадиган тадбиркорларни аккредитация қилиш билан шуғулланади.
Бундан ташқари, автомобиль юк ташиш хизматини лицензиялаш, халқаро юк ташиш фаолиятини олиб борувчи ҳайдовчилар квалификациясини ошириш, бундай фаолият олиб боришга рухсат бланкаларини бериш каби хизмат турларини ҳам хусусий секторга бериш режаланган.
Изоҳ (0)