Ўзбекистон Республикаси фавқулодда ва мухтор элчиси Алишер Агзамхўжаев (қароргоҳи Анқара шаҳрида) Болгария Республикаси Президенти Румен Радевга ишонч ёрлиқларини топширди. Бу ҳақда Ўзбекистон Республикаси Ташқи ишлар вазирлигининг матбуот хизмати хабар бермоқда.
Болгария Президенти Маъмурияти биносидаги тантанали маросимдан кейин суҳбат бўлиб ўтди. Болгария раҳбари икки томонлама муносабатлар ҳолатини юқори баҳолар экан, ҳамкорликни кенгайтириш учун мавжуд салоҳиятга эътибор қаратди.
Президент ишонч билдиришича, сўнгги икки йилда кузатилаётган Болгария—Ўзбекистон алоқаларининг фаоллашуви мамлакатларнинг сиёсий, савдо-иқтисодий ва маданий-гуманитар соҳалардаги ҳамкорлигини янада мустаҳкамлашга хизмат қилади.
Иккала давлат раҳбарларининг ўтган йили Нью-Йорк шаҳрида бўлиб ўтган учрашувида эришилган келишувларни амалга оширишдан, жумладан қишлоқ хўжалиги, олий таълим ва юқори технологиялар соҳаларида ҳамкорликни ривожлантиришдан томонлар манфаатдорлиги таъкидланди.
Ўзбекистон Болгариянинг минтақадаги дўсти, ишончли ва истиқболли ҳамкори эканлигини Болгария Президенти қайд этди, шунингдек, Болгария—Ўзбекистон муносабатларини томонларни қизиқтирган барча йўналишларда сифат жиҳатидан янги даражага кўтаришга мамлакати тайёр эканлигини билдирди.
Президент Румен Радев Президент Шавкат Мирзиёэвга самимий қутлов ва ўзининг чуқур эҳтиромини изҳор этди ва Болгария томони келгуси 2019 йилда мамлакат раҳбарининг Болгарияга ташрифини ташкил этишни режалаштираётганини тасдиқлади.
Изоҳ (0)