Фарғонада 4 минг литр газ конденсати билан қўлга тушган фуқаро ИИБ ходимига 1000 доллар пора таклиф қилди

Фарғонада ИИБ ходимига 1000 доллар пора берган фуқаро ушланди, деб хабар бермоқда «Дарё» мухбири Азизжон Эрматов.

Вилоят ИИБ терроризм ва экстремизмга қарши курашиш бошқармаси катта тезкор вакили томонидан Фарғона шаҳрида яшовчи, 1989 йилда туғилган фуқаро А.А. нефть қазиб олишда фойдаланиладиган қарийб 4000 литр газ конденсатини «Газ-53» русумли юк автомашинасида ноқонуний равишда олиб кетаётгани аниқланган. Мазкур ноқонуний «юк» Фарғона туманида жойлашган «Андижоннефть» АЖга қарашли «Риштоннефтгазкон» бўлимининг «Чимён» нефть қазиб олиш участкасига етказилиши керак бўлган.

Ҳолат юзасидан суриштирув ҳаракатлари олиб борилаётган вақтда, тўпланган ҳужжатларни судга чиқармаслик, ишни фуқаро А.А. фойдасига ижобий ҳал қилиш ҳамда «Андижоннефть» АЖнинг маъсул ходимларини суриштирув ишларига жалб этмаслик эвазига гумонланувчи ўз таниши М.Ф. орқали вилоят ИИБ терроризм ва экстремизмга қарши курашиш бошқармаси катта тезкор вакилига 10 миллион сўм пора таклиф қилган.

Тезкор вакилнинг билдиргисига асосан ИИВ ўз хавфсизлик бошқармаси Фарғона вилоят бўлими ва бошқа ҳуқуқни муҳофаза қилувчи идоралар ходимлари томонидан тезкор тадбир ўтказилди. Тадбир давомида фуқаро М.Ф. Фарғона вилояти ҳокимлигига қарашли автотураргоҳ олдида тезкор вакилга 1000 долларни пора тариқасида берган вақтида қўлга олинди.

Суриштирув жараёнида фуқаро М.Ф. «Андижоннефть» АЖга қарашли «Риштоннефтгазкон» бўлими ходимларидан ҳужжатларни терговга чиқармаслик эвазига 3000 доллар тўплаб олганлигини, 1000 АҚШ долларини тезкор вакилга пора тариқасида беришни режалаштириб, қолган 2000 АҚШ долларини хизмат ҳаққи эвазига олиб қўйганлигини билдирган.

Ҳолат юзасидан суриштирув ҳаракатлари олиб борилмоқда.