27 ноябрь куни Хоразм вилоятининг Шовот туманида ЙҲХБнинг 2-сонли туманлараро рўйхатдан ўтказиш ва имтиҳон олиш бўлинмаси ўз фаолиятини бошлади. Бу ҳақда вилоят ИИБ хабар берди.
Ўзбекистон Республикаси Ички ишлар вазирлиги ва вилоят ИИБ раҳбариятининг ташаббуси билан ташкил этилган бўлинма фуқароларнинг автомототранспорт воситалари учун давлат рақами белгиларини олиш, ҳайдовчилик гувоҳномаси учун имтиҳон топшириш ва транспорт воситаларини техник кўрикдан ўтказиш жараёнларида юзага келаётган ноқулайликлар, хусусан тирбандлик ва олис масофаларга бориб-келиш муаммоларини бартараф этиш мақсадида ташкил этилди.
Фуқаролар учун барча қулайликларни ўз ичига олган ушбу маъмурий бино сўнгги русумдаги оргтехника воситалари билан жиҳозланган.
Мазкур бўлинма хизматидан Хоразм вилоятининг Шовот, Гурлан ва Қўшкўпир туманлари фуқаролари фойдаланишлари мумкин.
Изоҳ (0)