PROlogue фестивали доирасида режиссёр Қамара Камоловага бағишланган китоб тақдимоти ўтказилди

PROlogue IV халқаро кинофестивалининг иккинчи куни кино ихлосмандлари учун маънавий озуқа берадиган лойиҳалар, турли маҳорат дарслари, қисқа метражли фильмлар танловлари билан қизғин давом этмоқда. Бу ҳақда «Дарё»га Ёшлар медиа маркази маълум қилди.

Режиссёр Қамара Камолованинг ҳаёти ва ижодига бағишланган «Кино – унинг иши» китобининг тақдимоти санъат оламига кириб келаётган ёш ижодкорлар учун маҳорат дарсига айланиб кетди.

Китобга киритилган материалларнинг аксарияти киношунос Елена Чайканинг Қамара Камолова яратган фильмлар ҳақида ёзган мақолалардан олинган.

Ўзбекистонда хизмат кўрсатган санъат арбобининг «Аччиқ данак», «Ўзганинг бахти», «Эртага чиқасанми?», «Бўлмаган нарса ҳақида», «Ёввойи», «Атроф оппоқ қор билан қопланган» каби бадиий фильмлари халқ қалбидан жой олган.

Китоб тақдимотида Қамара Камолова яратган фильмларда рол ижро этган актёр ва актрисалар, режиссёрнинг шогирдлари ва кино ихлосмандлари иштирок этди.

— Бугунги тақдимот устозим, ўзбек киносининг ардоқли ва атоқли режиссёри Қамара Камолова билан учраштириб, кино оламидаги қадамларимни яна бир бор эслатди. 9-синфда ўқиётган вақтимда «Атроф оппоқ қор билан қопланган» фильмида дебют ролимни ижро этганман. Мен бу инсондан миннатдорман. Чунки улардан кино соҳаси бўладими, ҳаёт тажрибасими, хуллас, жуда кўп нарсаларни ўрганганман ва ўрганиб келмоқдаман, — дейди Ўзбекистонда хизмат кўрсатган артист Раъно Шодиева.

Шу куннинг ўзида Ёшлар ижод саройида Қамара Камолованинг «Йўл бўлсин» номли фильмининг ретроспектив намойиши ҳам бўлиб ўтди.

— Мени кино оламида Қамара Камолова «дунёга келтирган» бўлса, Аюб Шаҳобиддинов «катта қилган», — дейди актёр Азиз Раметов. — Қамара Камолова режиссёрлигидаги «Йўл бўлсин» фильмидаги ролим билан кино дунёсига кириб келдим. Бугун бу фильм намойиш этилди. Ёшлар томоша қилди. Лекин кўпчилик охиригача ўтирмади. Томошабинларни «Бу қанақа кино ўзи, умуман тушунмадим» қабилидаги гаплари қулоғимга чалинганда, тўғриси, хафа бўлиб кетдим. Албатта, бу фильмни тушуниш учун озгина бўлса-да, ақл керак. Чунки «Йўл бўлсин» фильми рамзий маънога эга. Лекин қачонгача томошабинни ўйлаб, унинг йўриғига юриб, бачкана, фақат маиший мавзуларни акс эттирган киноларни оламиз?! Улар ҳам ақлини ишлацин, ўйлансин, кино руҳияти билан яшаб, унинг мазмунини ўзи чақиб олсин. Бежизга бундай фестиваллар ташкил этилаётгани йўқ.Уларни ўтказишдан мақсад ҳам аслида ҳақиқий санъат асарлари билан ёшларни таништиришдан иборат.

PROlogue фестивали доирасидаги тадбирлар давом этмоқда.