Термизда милиционер маст ҳолда хизмат машинасини бошқараётиб, ЙПХ ходимини уриб юборди, у вафот этди

10 ноябрь куни соат 24:00 ларда Термиз шаҳар ИИО ФМБ 1-сонли ИИБ ЖҚГ тезкор вакили Ж.М. хизмат юзасидан бириктирилган Damas русумли, 75/029 VSF давлат рақамли хизмат автомашинасини маст ҳолда бошқариб келиб, шаҳарнинг «Боғишамол» маҳалласи А.Навоий кўчасида хизмат вазифасини ўтаётган вилоят ИИБ ЙҲХБ АЙПХО 1-сафарбарлик гуруҳи ЙПХ катта инспектори П.Ч.ни уриб юбориб, йўл-транспорт ҳодисаси содир этган. Бу ҳақда Бош прокуратура матбуот хизмати хабар бермоқда.

П.Ч. олган тан жароҳатлари натижасида 19.11.2018 йилда Республика шошилинч тез тиббий ёрдам илмий маркази Сурхондарё филиалида вафот этган.

Суд-тиббий экспертизасининг 19.11.2018 йилдаги 207-сонли дастлабки хулосасига кўра, П.Ч.нинг ўлимига бош мия ёпиқ жароҳати, кўплаб суяк синиши жароҳатлари, ўткир юрак қон-томир етишмовчилиги сабаб бўлган.

Мазкур ҳолат юзасидан 19.11.2018 йилда Термиз шаҳар прокуратураси томонидан Ж.М.га нисбатан Ўзбекистон Республикаси ЖКнинг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.