Ўзбекистонда томошабинлар томонидан энг кўп кўриладиган телеканаллар номи эълон қилинди

Ўзбекистон электрон оммавий ахборот воситалари миллий ассоциацияси томонидан ҳар йили анаъанавий тарзда ўтказиладиган «Озод юрт тўлқинлари» медиа фестивали мамлакатдаги энг яхши нодавлат телерадиокомпанияларни аниқлади. Ушбу фестиваль ЎзЭОАВМА 15 йиллиги билан ҳамоҳанг тарзда ташкил этилди. Бу ҳақда ЎзЭОАВМА  матбуот хизмати хабар берди.

«Озод юрт тўлқинлари» медиа фестивали телевидение ва радио соҳасида эришган ютуқлари, мамлакатда соҳани ривожлантиришга қўшган ҳиссаси учун бериладиган мукофотдир.

Бу йил мукофот 10 та теле-радиостанция учун қуйидаги номинациялар бўйича берилди:

• «Энг яхши инновацион ёндашув учун» - «Zo‘r TV» телеканали ҳамда «O‘zbegim taronasi» радиостанцияси;
• «Оилавий қадриятлар доим трендда» ғоясини илгари сургани учун» - «Sevimli» телеканали, ҳамда «Oriat FM» радиостанцияси;
• «Тезкор, аниқ, батафсил» ахборот тарқатгани учун» -«UzReport-TV» телеканали ҳамда «Poytaxt» радиостанцияси;
• «Марказда ёшлар» ғоясини тарғиб этганлиги учун» - «Mening yurtim» телеканали ҳамда «Нукус ФМ» радиостанцияси;
• «Ҳудудда етакчи» оммавий ахборот воситаси бўлганлиги учун»- «Istiqlol» телеканали (Бухоро) ҳамда «Рухсор ФМ» (Марғилон) радиостанцияси.

«Бу йил ЎзЭОАВМА Экспертлар Кенгаши «Озод юрт тўқинлари» медиа-фестивали ғолибларини аниқлашда «Kantar TNS» телеешиттиришлари бўйича олиб борган тадқиқотлар натижаларини ҳисобга олди. Бу эса ўз навбатида мамлакат телевидение индустрияси ва миллий реклама бозори учун муҳим янгилик. Ноябрь ойининг биринчи ярмидаги тадқиқотларимиз шуни кўрсатдики, ‘Zo‘r-TV’, ‘Sevimli-TV’, ‘Mening yurtim’ нодавлат телеканаллари томошабинлар томонидан энг кўп кўрилган каналлар сифатида етакчилик қилди. Янгилик ва ахборот сегментида эса ЎзЭОАВМАнинг ‘Zamon’ ахборот-таҳлилий дастури ҳамда ‘Mening yurtim’ телеканалининг ‘Markaziy studiya’ дастурлари юқорилади», — дейди ЎзЭОАВМА бошқаруви раиси Фирдавс Абдухолиқов.

Фестиваль давомида бир қатор журналистлар ва техник ходимлар ассоциация ҳамкорлари, жумладан, Германиянинг Конрад Аденауэр жамғармасининг Ўзбекситондаги ваколатхонаси, UNЕSCO, шунингдек, Ўзбекистоннинг бир қатор давлат ва жамоат ташкилотлари томонидан қимматбаҳо совғалар билан тақдирланди.