21 ноябрь куни Тошкентдаги Hyatt Regency меҳмонхонасида Ўзбекистон Интеллектуал мулк агентлиги Бутунжаҳон интеллектуал мулк ташкилоти ҳамкорлигида муаллифлик ҳуқуқига нисбатан ҳурмат ҳиссини ривожлантириш ва рақамли муҳитда контрафакт ва қароқчиликка қарши кураш масалаларига бағишланган субрегионал семинар ўтказилди. Бу ҳақда «Дарё» мухбири Севара Нишонова хабар берди.
Рақамли технологиялар, шу жумладан интернетнинг жадал ривожланиши барча давлатларнинг интеллектуал мулк тизимига жиддий таъсир кўрсатмоқда ва бир пайтнинг ўзида рақамли муҳитда интеллектуал мулкка бўлган ҳуқуқларнинг самарали муҳофазаси ва ҳимояси соҳасида ҳам жиддий муаммоларни келтириб чиқармоқда.
Маълумки, муаллифлик ҳуқуқига тегишли кўп турдаги объектларнинг (адабий ва мусиқа асарлари, фильмлар) рақамли форматга ўтказилиши, музей коллекцияларининг рақамли форматга ўтказилиши интеллектуал мулкнинг интернетда кенг тарғиб қилиш имконини берди.
Шунингдек, дастурий таъминот, патент қонунчилиги ёки муаллифлик ҳуқуқи бўйича қонунчилик томонидан муҳофаза қилинувчи интеллектуал мулкнинг бир тури сифатида рақамли муҳитда кенг қўлланилмоқда.
Шундай қилиб, рақамли муҳит, шу жумладан интернет тармоғи, бугунги кунда электрон савдо, таълим, маданият макони, шунингдек муаллифлик ҳуқуқи ва турдош ҳуқуқлар бўйича қонунчилик билан муҳофаза қилинадиган асарларни тарқатиш макони бўлиб хизмат қилмоқда. Бошқа томондан эса бу ахборот алмашинуви жадал кечаётган тизим бўлиб, бунда кўп ҳолатларда муаллифлар ва интеллектуал мулк эгалари ҳуқуқларининг бузилишига йўл қўйилмоқда.
Бундай шароитда муаллифлик ҳуқуқи ва турдош ҳуқуқларга оид фундаментал принципларнинг рақамли муҳитда амалга оширилиши алоҳида аҳамият касб этади, бу эса ўз навбатида интеллектуал мулк муҳофазасига, бу соҳада ҳуқуқбузарликларнинг олдини олишга қаратилган чора-тадбирларнинг кучайтирилишини талаб қилади.
Семинарда айнан шу масалаларга, яъни муаллифлик ҳуқуқи ва турдош ҳуқуқларнинг ҳуқуқий муҳофазаси, рақамли муҳитда контрафакция ва қароқчиликка қарши курашиш масалаларига, шунингдек бу соҳада тажриба алмашишга қаратилди.
Семинарда Бутунжаҳон интеллектуал ташкилоти ҳуқуқий масалалар бўйича маслаҳатчиси Томас Диллон, Лондондан ташриф буюрган ҳуқуқшунос Гай Триттон ҳамда Ўзбекистон Юристлар малакасини ошириш республика маркази кафедра мудири, юридик фанлар номзоди Бобоқул Тошев спикер сифатида иштирок этди ва мавзу юзасидан маъруза қилди.
Бутунжаҳон интеллектуал мулк ташкилоти Кавказ, Марказий Осиё ва Шарқий Европа мамлакатлари бўлими бошлиғи Иля Грибков тадбир модератори сифатида иштирок этди.
Семинар 22 ноябрь куни ўз ишини якунлайди.
Изоҳ (0)