19 ноябрь куни Тошкентдаги Wyndham меҳмонхонасида «Боланинг ҳар томонлама ривожланишини таъминлашда инновацион таълим муҳитининг ўрни» мавзусида халқаро анжуман бўлиб ўтди. Бу ҳақда Мактабгача таълим вазирлиги матбуот хизмати хабар берди.
Анжуман Мактабгача таълим вазирлиги, БМТ (UNICEF) Болалар фонди, Жаҳон Банки гуруҳи томонидан ташкил этилди.
Анжуманнинг асосий мақсади – Ўзбекистон Республикаси мактабгача таълим соҳасида инновацион таълим муҳитини тадқиқ ва татбиқ этишдан иборат бўлди.
Халқаро анжуман Ўзбекистон Республикаси президентининг ёшлар, илм, таълим, соғлиқни сақлаш ва спорт масалалари бўйича маслаҳатчиси Абдужабор Абдувахитов, Мактабгача таълим вазири Агриппина Шин, Жаҳон Банкининг Ўзбекистондаги ваколатхонаси раҳбари жаноб Хидеки Мори, UNICEF’нинг Ўзбекистондаги ваколатхонаси раҳбари Саша Грауманн ва бошқалар томонидан очиб берилди.
«Рақобатбардош мактабгача таълим тизимини яратиш учун унга янгича бошқарув тамойилларини киритиш лозим. Яъни, бунда ахборот, кадрлар, бошқарув ва молиявий ресурсларининг интеграциялашуви ва ҳамкорлигига асосланган тамойилларни жорий этиш талаб этилади. Мактабгача таълим соҳасидаги ўқув муҳитини яратиш ва шакллантиришнинг самарали механизмларини жорий етиш нодавлат мактабгача таълим муассасалари тармоғини ривожлантириш, кўрсатилаётган хизматларнинг сифатини яхшилаш ва соғлом рақобат муҳитини тезроқ шакллантиришга ёрдам беради», - деди Ўзбекистон Республикаси Мактабгача таълим вазири Агриппина Шин.
Анжуманда инновацион таълим муҳити доирасидаги лойиҳаларни амалга оширувчи халқаро экспертлар сўзга чиқди. Солфорд Университетининг фахрий профессори, Оксфорд Университетининг фахрий илмий ходими профессор Питер Барретт «ақлли синф хоналари»нинг таълим самарадорлигига ва сифатига таъсир этишини очиб берди, бу борада у уч асосий тушунчани: ҳиссиёт, ақл ва муҳитни ажратиб кўрсатди.
«Бола ҳуқуқлари нуқтаи назаридан, ҳар бир бола жисмоний, ҳиссий, ижтимоий ва когнитив ривожланиш учун яхлитлик ёндашуви асосида ишлаб чиқилган таълим имкониятларга эга бўлиши муҳим аҳамиятга эга. Ўзбекистоннинг ҳар бир учинчи фуқароси бола хисобланади ва кейинги 20 йил ичида улар мамлакатнинг энг катта ишчи кучига айланадилар. Мамлакат ўз демографик имкониятларидан фойдалана олиши учун бор имкониятларини ишга солиб, ҳозирданоқ ёш болалар билимини ошириш учун инвестиция киритиши лозим. Халқаро тажриба шуни қўрсатмоқдаки, ёш болаларнинг ҳар томонлама ривожланиши учун керакли шарт-шароитлар яратиш, мамлакатнинг узоқ муддатли ижтимоий-иқтисодий ривожланишига киритлган оқилона сармоя сифатида хизмат қилмоқда», - деди UNICEF’нинг Ўзбекистондаги ваколатхонаси раҳбари Саша Грауманн.
«Ҳукумат 2021 йилга келиб 6—7 ёшдаги болаларнинг 100 фоизини мактабгача таълим билан таъминлашни режалаштирган. Бу юқори ва шу билан бирга тўлиқ амалга оширилиши мумкин бўлагн мақсаддир. Жаҳон банки ўзининг глобал тажрибаси ва молиявий ресурсларидан фойдаланган ҳолда, Ўзбекистон мактабгача таълим соҳасини ислоҳ қилишда сайи ҳаракатларини аямаслигини билдиради. Хусусан, 2019 йилда Жаҳон банки болаларга сифатли таълим хизматларини кўрсатишни таъминлаш ва мактабгача таълим тизимини такомиллаштиришга, жумладан, қишлоқ ва шаҳарларда тълим олиш шароитларини яхшилашга қаратилган лойиҳа учун 55 миллион АҚШ доллари ажратади», - деди Жаҳон банкининг Ўзбекистондаги ваколатхонаси раҳбари Хидеки Мори.
Анжуманда 400 нафардан ортиқ киши мунозаралар ва панелли муҳокамаларда иштирок этди.
Изоҳ (0)