Адлия вазирлиги томонидан ўтказилаётган «Коррупция – тараққиёт кушандаси» номли иншолар танловининг иккинчи босқичи 15 ноябрь куни ўз ниҳоясига етди. Иншолар 22 ноябргача баҳоланади ва натижалар эълон қилинади. Бу ҳақда «Дарё»га вазирлик мутасаддилари маълум қилди.
Ҳакамлар ҳайъати ёш авлоднинг ушбу иллатга нисбатан ўзига хос фикри, қатъий позицияси, тоқатсизлиги мавжудлигини алоҳида таъкидламоқда. Шу билан бирга, айрим нохуш ҳолатлар, хусусан, кўчирмакашлик ҳам кузатилмоқда. Шундай иншолардан бир нечтаси аниқланди ва иштирокчилар дисквалификация қилинди.
Танловда ўз ёши, муҳити, дунёқарашига мос, оригинал фикрлар билан иншо ёзган иштирокчилар ғолиб бўлади. Бунинг учун қарийб 60 кишидан зиёд ҳакамлар жамоаси меҳнат қилмоқда.
«Ижодий ишингизни содда, самимий фикрлар билан бойитишга ҳаракат қилинг. Иқтибослар, ҳикматли сўзлар ва бошқа кўчирмаларга ҳавола беришни унутманг. Ҳаволасиз олинган фикрлар кўчирилган ҳисобланиб, иштирокчи мусобақани давом эттириш ҳуқуқидан маҳрум қилинади», — дейилади вазирлик хабарида.
Эслатиб ўтамиз, иншолар танлови ғолибларига 2 та Samsung Galaxy S9 смартфони ҳамда бошқа қимматбаҳо совғалар топширилади. Шунингдек, Apple iPhone X смартфонини ютиб олиш имкони ҳам бор.
Изоҳ (0)