Россия АҚШнинг Ўрта ва кичик масофали ракеталар тўғрисидаги шартнома (ЎКМРШ)дан чиқишини жавобсиз қолдирмайди. Бу ҳақда Россия президенти Владимир Путин маълум қилди, деб ёзади «Интерфакс».
«Яна бир бора таъкидлайман: биз ушбу асосий масала бўйича америкалик шерикларимиз билан музокаралар олиб боришга тайёрмиз ва улар бунга тўла масъулият билан ёндашади, деб умид қиламиз. Чунки АҚШнинг ушбу шартномадан чиқиш ҳақидаги қарори, шубҳасиз, биз томонимиздан жавобсиз қолиши мумкин эмас, ва қолмайди ҳам», — деди у.
Путин Россия армиясида ҳар қандай ракетага қарши мудофаа тизимини енга оладиган гипертовушли қурол борлигини эслатди. Унинг сўзларига кўра, Москва уни Вашингтон ракетага қарши мудофаа бўйича шартномадан бир томонлама тартибда чиққанидан кейин ишлаб чиқишга мажбур бўлган. Шу муносабат билан Россия етакчиси мамлакат ўзини қуролланиш пойгасига аралаштиришларига йўл қўймаслиги кераклигини таъкидлади.
Изоҳ (0)