Навоийда 50 ёшли ўғил уйни номига ўтказиб беришни талаб қилиб 78 яшар онасини калтаклади

Навоий шаҳрида 78 яшар онасига қўл кўтарган 50 ёшли фуқарога нисбатан суд ҳукми ўқилди. Бу ҳақда «Халқ сўзи» хабар бермоқда.

Навоий шаҳрилик Ж. К. ўғрилик жинояти учун яқинда суднинг қора курсисида ўтирган эди. Ўшанда оилавий шароити, саломатлиги инобатга олиниб, суд озодликни чеклаш билан боғлиқ жазо ҳукмини чиқарган.

Бундан ўзига тегишли хулоса чиқармаган Ж.К. спиртли ичимлик таъсирида яна бир жиноятни содир этди. У 78 ёшли онасини «уйни менинг номимга ўтказиб берасан», деб уриб, тан жароҳати етказди.

Суд Ж.К.га нисбатан бу гал ҳам инсонпарварлик намунасини намойиш этди. Унинг оғир хасталиги инобатга олиниб, озодликни чеклаш билан боғлиқ жазо тайинланди.