Қирғизистонда охирги икки ҳафта ичида 3 та газета фаолиятини тўхтатди. Бу ҳақда мазкур газеталар босилган «ОАВни қўллаб-қувватлаш маркази» бўлим мудири Бақит Дийқанов маълум қилди, дея хабар беради «Turon 24».
Маълумотларга кўра, ноябрь ойи бошидан бери «Фабула», «Тамчи» ва «Алло, реклама» газеталари чиқишдан тўхтади.
«Газеталарни чоп этиш тўхтатилишининг асосий сабаби ўқувчилар сони камлиги. Кўпчилик газеталар интернет-форматга ўтди. Гарчи кекса авлод вакиллари газета ўқишаётган бўлса-да, бошқалар бундай мутолаадан воз кечган. Охирги икки-уч йил ичида газета ададлари 30-35 фоиз қисқариб кетди», — дейди Бақит Дийқанов.
«ОАВни қўллаб-қувватлаш маркази»да 130 га яқин газета нашр этилади. Энг йирик тиражлар 70-80 минг нусхани ташкил этади. Шунингдек, адади мингтага етмайдиган газеталар ҳам чиқарилмоқда.
«Фабула» газетаси муҳаррири Тилек Рисқулов аввалроқ нашридаги молиявий қийинчиликлар ва обуначилар сони қисқариб кетгани ҳақида маълум қилган эди. Унга кўра, таҳририят фаолиятини интернет тармоғига кўчиришга қарор қилинган.
Қирғизистон Марказий Осиё давлатлари орасида давлатга тегишли ОАВларнинг аксариятига барҳам берилиб, газета, журнал, радио ва телевидениелар мустақил фаолият юритадиган ягона мамлакат ҳисобланади. Қирғизистонда ҳеч бир нашрга мажбурий обуна татбиқ этилмайди. Кузатувчиларнинг фикрича, мажбурий обунанинг орадан кўтарилиши газета, журналларни элакдан ўтказади.
«Turon 24»нинг қайд этишича, айни пайтда мажбурий обунага барҳам берилаётган Ўзбекистонда ҳам кўплаб газета-журналларнинг тиражи пасайиб кетган.
Изоҳ (0)