Сурхондарё вилояти давлат солиқ хизмати органлари томонидан хўжалик юритувчи субъектларнинг молиявий ҳисоботларига таяниб охирги 5 йилда тўланган дивиденд тўловларини солиққа тортилиши камерал назоратдан ўтказилмоқда. Бу ҳақда вилоят солиқ бошқармаси матбуот хизмати хабар берди.
Маълум бўлишича, 2016—2017 йиллар мобайнида вилоятдаги 8 та корхона тақсимланадиган соф фойдаси кам бўлса-да, 2 784 миллион сўмлик маблағларини дивиденд кўринишида ҳисоб рақамларидан ноқонуний равишда тўлаб берган. Оқибатда давлат бюджетига 374,1 миллион сўм солиқлар тушмай қолган.
Белгиланган тартибга кўра, фойдаси йўқ ёки зарар билан ишлаётган юридик шахснинг дивиденд деб тўлаб берган маблағи жисмоний шахсларнинг даромад солиғи ставкасида, агар юридик шахсларга тўланган бўлса, уларнинг бошқа даромадлари таркибига киритилиб, солиққа тортилиши шарт.
Масалан, «Денов риелтор сервис» МЧЖ раҳбари жорий ва тақсимланмаган фойдаси 7,3 миллион сўм бўлса-да, 61,8 миллион сўм маблағини дивиденд тўлови деб, 10 фоиз ставкада 6,1 миллион сўм солиқ тўлаб ҳисоб рақамидан олган. Аслида ушбу корхона томонидан 22,5 фоиз ставкада 13,9 миллион сўм солиқ тўланиши лозим эди.
Юқоридагилардан келиб чиқиб аниқланган тафовутлар юзасидан хўжалик юритувчи субъектларга аниқланган солиқ суммаларига нисбатан талабномалар юборилди.
Эслатиб ўтамиз, солиқ тўловчилар Солиқ кодексининг 31-моддасига мувофиқ солиқларни ҳисоблаб чиқариш ва тўлашда ўзлари йўл қўйган хатоларини мустақил равишда тузатиш ҳуқуқига эгадир.
Изоҳ (0)