Surxondaryo viloyati davlat soliq xizmati organlari tomonidan xo‘jalik yurituvchi subyektlarning moliyaviy hisobotlariga tayanib oxirgi 5 yilda to‘langan dividend to‘lovlarini soliqqa tortilishi kameral nazoratdan o‘tkazilmoqda. Bu haqda viloyat soliq boshqarmasi matbuot xizmati xabar berdi.
Ma’lum bo‘lishicha, 2016—2017-yillar mobaynida viloyatdagi 8 ta korxona taqsimlanadigan sof foydasi kam bo‘lsa-da, 2 784 million so‘mlik mablag‘larini dividend ko‘rinishida hisob raqamlaridan noqonuniy ravishda to‘lab bergan. Oqibatda davlat budjetiga 374,1 million so‘m soliqlar tushmay qolgan.
Belgilangan tartibga ko‘ra, foydasi yo‘q yoki zarar bilan ishlayotgan yuridik shaxsning dividend deb to‘lab bergan mablag‘i jismoniy shaxslarning daromad solig‘i stavkasida, agar yuridik shaxslarga to‘langan bo‘lsa, ularning boshqa daromadlari tarkibiga kiritilib, soliqqa tortilishi shart.
Masalan, “Denov rieltor servis” MChJ rahbari joriy va taqsimlanmagan foydasi 7,3 million so‘m bo‘lsa-da, 61,8 million so‘m mablag‘ini dividend to‘lovi deb, 10 foiz stavkada 6,1 million so‘m soliq to‘lab hisob raqamidan olgan. Aslida ushbu korxona tomonidan 22,5 foiz stavkada 13,9 million so‘m soliq to‘lanishi lozim edi.
Yuqoridagilardan kelib chiqib aniqlangan tafovutlar yuzasidan xo‘jalik yurituvchi subyektlarga aniqlangan soliq summalariga nisbatan talabnomalar yuborildi.
Eslatib o‘tamiz, soliq to‘lovchilar Soliq kodeksining 31-moddasiga muvofiq soliqlarni hisoblab chiqarish va to‘lashda o‘zlari yo‘l qo‘ygan xatolarini mustaqil ravishda tuzatish huquqiga egadir.
Izoh (0)