Навоий тоғ-металлургия комбинати 2018—2027 йилларда «Мурунтов» конида олтин қазиб чиқаришни кенгайтириш бўйича 733,9 миллион долларлик лойиҳани амалга оширади. Бу ҳақда Ўзбекистон Вазирлар Маҳкамасининг 5 ноябрда имзоланган «Мурунтов конини ўзлаштириш (V навбати) 1-босқичи инвестиция лойиҳасининг техник-иқтисодий асосини тасдиқлаш тўғрисидаги қарорида айтилади.
Ушбу ҳужжат билан инвестицион лойиҳанинг техник-иқтисодий асослари, асосий техник-иқтисодий кўрсаткичлари тасдиқланган. У Мурунтов кони бешинчи навбатини ўзлаштириш ва ишлаб чиқариш ҳажмини йилига 47 миллион тонна рудагача оширишни кўзда тутади. Инвестицион лойиҳани амалга ошириш муддати — тўққиз йил.
Лойиҳани молиялаштириш Навоий тоғ-металлургия комбинатининг 445,9 миллион долларлик ўз маблағлари ҳисобига ва Ўзбекистон тикланиш ва тараққиёт жамғармасининг 288 миллион доллар маблағлари ҳисобига амалга оширилади.
Мурунтов дунёдаги энг йирик олтин-руда конларидан бири ҳисобланади. У ишга тушганидан буён 1,5 миллиарддан ортиқ руда қазиб олинган. Ҳозирги кунда коннинг чуқурлиги 570 метрни ташкил этади.
Изоҳ (0)