Андижонликлар орасида ва ижтимоий тармоқларда «Андижон аэропорти ёпилиб, хусусийлаштирилар экан. Шу туфайли парвозлар тўхтатилибди» қабилидаги гап-сўзлар болаламоқда. Журналист Миролим Исажонов вазиятга ойдинлик киритиш мақсадида мутасадди ташкилотлар вакиллари билан боғланишга уринди.
«Шамол бўлмаса, дарахтнинг учи қимирламайди», деганларидек халқ орасида урчиётган гап-сўзларга аниқлик киритиш ниятида 3 ноябрь куни Андижон халқаро аэропорти қабулхонасига қўнғироқ қилдик. Ўзини таништиришни истамаган ходим «Бундай гапларни ўзимиз ҳам эшитиб хайрон бўлаяпмиз. Парвозларнинг тўхтатилгани рост, аммо яқин орада яна қатновлар йўлга қўйилиши кутилмоқда. Бугун шанба дам олиш куни бўлганлиги сабабли душанба куни қўнғироқ қилинг, саволингизга жавоб оласиз», дея хотиржам қилди. 5 ноябрь куни эса ҳудди ўша рақамга қўнғироқ қилиб, боғлана олмадик.
6 ноябрь кунги уринишларимизга эса гўшакни кўтарган ходимлар «Ўзбекистон ҳаво йўллари» билан боғланинглар. Улар аниғини айтади», дея жавоб берди. Компания матбуот хизматига қўнғироқ қилиб, Зумрад Шожалилова билан алоқага чиқдик. Унга мақсадимизни тушунтиргач, «Кечга қадар раҳбарлардан расмий жавоб олиб, юборишга ҳаракат қиламан», деган фикрни олдик. Унинг гапларига ишониб, хато қилибмиз. Негаки матбуот котиби орадан бир кун ўтди ҳамки, на тайинли жавоб айтди, на қўнғироқларга, на SMSларга жавоб берди.
Андижон халқаро аэропорти ходимлари ҳам «Биз бу ҳақда аниқ фикр билдиролмаймиз. Ҳозир кўпчилик пахтада. Раҳбарлар билан боғланинглар», дейишдан нарига ўтмади. Миш-мишлар нечоғлик ростлигига ишонч ҳосил қилиш мақсадида олиб борган суриштирувимиз давомида «Отангга бор, онангга бор» қабилидаги жараённи кўриб, «Юқоридаги гап-сўзлар наҳотки чин бўлса-я?», деган гумонлар пайдо бўлди.
«Аэропорт фаолиятини жонлантириш керак»
Шу йил 28 октябридан ўз парвозларини тўхтатган халқаро аэропорт ҳақида андижонликларнинг фикр-мулоҳазаларига қулоқ тутдик.«Бир неча йилдан буён тадбиркорлик фаолияти билан шуғулланаман. Деярли ҳар йили иш юзасидан ёки дам олгани дунёнинг қайсидир шаҳрига бораман. Ҳар сафар Тошкент халқаро аэропортидан парвоз қиламиз. Пойтахтга бориш ва қайтишда оворагарчиликлар билан бўлиб, ҳам маблағни, ҳам вақтни бой берамиз. Йўл азоби ҳам кишини толиқтиради. Бирор марта ҳам вилоятимиздаги аэропортдан учмаганман. Яқинда Миср пойтахти Қоҳирага бориб, келдим. Таассуротлар жуда катта. Авваллари Андижон аэропортидан ўнлаб йўналишларга қатновлар йўлга қўйилганди. Ҳозир ундай эмас. Туристларни жалб қилиш учун ҳам аэропорт фаолиятини янада жонлантириш керак, деган фикрдаман. Шунда биз тадбиркорлар ҳам овора бўлиб, қийинчиликларга дуч келмасдик», дейди исмини айтишни хоҳламаган ишбилармон.
Тадбиркорнинг фикрларида жон бор. Андижон халқаро аэропорти қачон ўз номига муносиб бўлиб, халқаро миқёсдаги парвозларни йўлга қўяди? Сайёҳлар қачонгача «Поп—Наманган—Андижон» поезди орқали Андижонга келади? Қачондан бошлаб хорижликлар Андижонга, андижонликлар эса хорижга тўғридан-тўғри парвоз қилади?
«Ўзбекистон ҳаво йўллари» МАКдан шу каби саволлар ва юқоридаги миш-мишларга ойдинлик киритилган жавобни кутиб қоламиз.
Изоҳ (0)