Andijonliklar orasida va ijtimoiy tarmoqlarda “Andijon aeroporti yopilib, xususiylashtirilar ekan. Shu tufayli parvozlar to‘xtatilibdi” qabilidagi gap-so‘zlar bolalamoqda. Jurnalist Mirolim Isajonov vaziyatga oydinlik kiritish maqsadida mutasaddi tashkilotlar vakillari bilan bog‘lanishga urindi.
“Shamol bo‘lmasa, daraxtning uchi qimirlamaydi”, deganlaridek xalq orasida urchiyotgan gap-so‘zlarga aniqlik kiritish niyatida 3-noyabr kuni Andijon xalqaro aeroporti qabulxonasiga qo‘ng‘iroq qildik. O‘zini tanishtirishni istamagan xodim “Bunday gaplarni o‘zimiz ham eshitib xayron bo‘layapmiz. Parvozlarning to‘xtatilgani rost, ammo yaqin orada yana qatnovlar yo‘lga qo‘yilishi kutilmoqda. Bugun shanba dam olish kuni bo‘lganligi sababli dushanba kuni qo‘ng‘iroq qiling, savolingizga javob olasiz”, deya xotirjam qildi. 5-noyabr kuni esa huddi o‘sha raqamga qo‘ng‘iroq qilib, bog‘lana olmadik.
6-noyabr kungi urinishlarimizga esa go‘shakni ko‘targan xodimlar “O‘zbekiston havo yo‘llari” bilan bog‘laninglar. Ular anig‘ini aytadi”, deya javob berdi. Kompaniya matbuot xizmatiga qo‘ng‘iroq qilib, Zumrad Shojalilova bilan aloqaga chiqdik. Unga maqsadimizni tushuntirgach, “Kechga qadar rahbarlardan rasmiy javob olib, yuborishga harakat qilaman”, degan fikrni oldik. Uning gaplariga ishonib, xato qilibmiz. Negaki matbuot kotibi oradan bir kun o‘tdi hamki, na tayinli javob aytdi, na qo‘ng‘iroqlarga, na SMSlarga javob berdi.
Andijon xalqaro aeroporti xodimlari ham “Biz bu haqda aniq fikr bildirolmaymiz. Hozir ko‘pchilik paxtada. Rahbarlar bilan bog‘laninglar”, deyishdan nariga o‘tmadi. Mish-mishlar nechog‘lik rostligiga ishonch hosil qilish maqsadida olib borgan surishtiruvimiz davomida “Otangga bor, onangga bor” qabilidagi jarayonni ko‘rib, “Yuqoridagi gap-so‘zlar nahotki chin bo‘lsa-ya?”, degan gumonlar paydo bo‘ldi.
“Aeroport faoliyatini jonlantirish kerak”
Shu yil 28-oktabridan o‘z parvozlarini to‘xtatgan xalqaro aeroport haqida andijonliklarning fikr-mulohazalariga quloq tutdik.“Bir necha yildan buyon tadbirkorlik faoliyati bilan shug‘ullanaman. Deyarli har yili ish yuzasidan yoki dam olgani dunyoning qaysidir shahriga boraman. Har safar Toshkent xalqaro aeroportidan parvoz qilamiz. Poytaxtga borish va qaytishda ovoragarchiliklar bilan bo‘lib, ham mablag‘ni, ham vaqtni boy beramiz. Yo‘l azobi ham kishini toliqtiradi. Biror marta ham viloyatimizdagi aeroportdan uchmaganman. Yaqinda Misr poytaxti Qohiraga borib, keldim. Taassurotlar juda katta. Avvallari Andijon aeroportidan o‘nlab yo‘nalishlarga qatnovlar yo‘lga qo‘yilgandi. Hozir unday emas. Turistlarni jalb qilish uchun ham aeroport faoliyatini yanada jonlantirish kerak, degan fikrdaman. Shunda biz tadbirkorlar ham ovora bo‘lib, qiyinchiliklarga duch kelmasdik”, deydi ismini aytishni xohlamagan ishbilarmon.
Tadbirkorning fikrlarida jon bor. Andijon xalqaro aeroporti qachon o‘z nomiga munosib bo‘lib, xalqaro miqyosdagi parvozlarni yo‘lga qo‘yadi? Sayyohlar qachongacha “Pop—Namangan—Andijon” poyezdi orqali Andijonga keladi? Qachondan boshlab xorijliklar Andijonga, andijonliklar esa xorijga to‘g‘ridan-to‘g‘ri parvoz qiladi?
“O‘zbekiston havo yo‘llari” MAKdan shu kabi savollar va yuqoridagi mish-mishlarga oydinlik kiritilgan javobni kutib qolamiz.
Izoh (0)