Малайзиянинг Serba Dinamik компанияси Ўзбекистонда 250 млн долларлик каустик сода заводини қурмоқчи

Хоразм вилояти ҳокимлигида Ўзбекистон инвестициялар бўйича давлат қўмитаси раисининг биринчи ўринбосари Суннатулла Бекенов ва Хоразм вилояти ҳокими Фарҳод Эрманов Малайзиянинг Serba Dinamik компанияси вице-президенти Палендран Палачандран билан учрашув ўтказди, деб хабар беради «Podrobno.uz».

Учрашув давомида Малайзия компаниясининг Ҳазорасп ЭИЗда каустик сода ишлаб чиқариш бўйича қиймати 250 миллион долларлик инвестицион лойиҳасини амалга ошириш масалалари муҳокама қилинди.

Палачандраннинг билдиришича, декабрь ойида мазкур лойиҳани амалга ошириш бўйича ҳамкорлик тўғрисидаги келишув ва 2019 йил апрелда инвестицион келишув имзоланади. Лойиҳани амалга ошириш муддати инвестицион келишув имзоланган кундан бошлаб 18 ойни ташкил этади.

Компаниядагиларнинг хабар беришича, лойиҳа қиймати 250 миллион долларни ташкил этади, 120 та янги иш ўрни яратилади. Ишлаб чиқарилган барча маҳсулот экспортга мўлжалланади.

Каустик содани ишлаб чиқаришдан кейинги саноат чиқиндиси бўлган хлор Шимолий Африка мамлакатларига экспорт қилинади.

Serba Dinamik  компанияси нефть-газ ва энергетика саноатига технологик қурилмалар етказиб бериш ва инженерлик хизматлари кўрсатиш билан шуғулланади. Компания Индонезия, Саудия Арабистони, БАА, Буюк Британияда фаолият олиб боради.

Компаниянинг Малайзия бозоридаги ҳажми 1 миллиард долларга яқин бўлиб, ходимлари сони 1,5 мингдан ошади.