Айни кунларда Тошкент шаҳрида Халқ таълими вазирлиги Британия Кенгашининг Ўзбекистондаги ваколатхонаси билан ҳамкорликда таълим тизимида инглиз тили ўқитилишида ислоҳотларни қўллаб-қувватлаш бўйича янги миллий жамоасининг йиғилиши бўлиб ўтмоқда. Бу ҳақда ЎзА хабар берди.
Халқ таълими тизимидаги ислоҳотларнинг асосий йўналишларидан бири инглиз тилини сифатли ва самарали ўқитишни йўлга қўйишдир. Бунинг учун, аввало, инглиз тилини ўқитишнинг қулай ва тезкор амалиётини ўрганиш, шунингдек, жараёнга юқори малакали халқаро экспертлар гуруҳини ҳамда ҳамкорларни жалб этиш муҳим вазифалардан бири ҳисобланади.
Шуни айтиш жоизки, миллий жамоа мамлакатдаги барча умумтаълим мактабларида инглиз тилини ўқитиш амалиёти бўйича бирламчи тадқиқот ўтказди. Яъни, улар дарсларда иштирок этиб, ўқитувчилар билан учрашди, ўқув режа ва материаллар, бундан ташқари, дарс ва дарсдан ташқари фойдаланиладиган манбаларни ўрганди.
Тадқиқотнинг бирламчи натижаларини муҳокама этиш, бошланғич ва ўрта синфлар учун дарсликларни тайёрлаш тажрибасини ўрганиш миллий гуруҳнинг семинарига Буюк Британиянинг мактабларда инглиз тилини ўқитиш бўйича консултанти Венди Арнольд хоним таклиф этилди.
Арнольд хонимнинг фикрича, таълим тизими ва ўқув дастурлари ўзгариши, ўқитувчиларни тайёрлаш тизими билан биргаликда олиб борилиши керак экан.
Дастур якунига кўра, миллий жамоа маҳаллий ва халқаро илғор тажрибаларини инобатга олган ҳолда мактабларда инглиз тилини ўқитиш тизимини ислоҳ этиш бўйича ҳаракат режасини ишлаб чиқади. Жамоа йиғилиши 12 ноябрга қадар давом этади.
Изоҳ (0)