Tojikiston prezidenti Emomali Rahmon sentyabr oyi o‘rtalarida Tog‘li Badaxshon muxtor viloyatiga tashrifi vaqtida hududdagi jinoyatchilik darajasidan g‘azabga tushgan edi, shundan so‘ng mahalliy ma’muriyat hududning norasmiy yetti yetakchisidan jinoyatlarga barham berishni so‘ragan edi. “Sputnik”ning yozishicha, endi bu norasmiy yetakchilar Emomali Rahmon bilan uchrashmoqchi.
Tojikiston davlat rahbari bilan uchrashish istagini to‘rt badaxshonlik — Tolib Ayombekov, Yodgor Mamadaslomov, Munavvar Shanbiyev va Zoir Rajabov bildirgan. Ular buning uchun ataylab Xorogdan Dushanbega kelgan. Qayd etishlaricha, Tog‘li Badaxshon rasmiylari hudud kriminal yetakchilarining Tojikiston poytaxtiga safaridan boxabar.
“Ular prezizdent bilan uchrashmoqchi, Xorogdagi ularning nazaridagi real vaziyat haqida davlat rahbari bilan gaplashmoqchi”, — dedi Tog‘li Badaxshon muxtor viloyati raisi matbuot kotibi G‘olib Niyatbekov. OAV ma’lumotlariga ko‘ra, Dushanbega kelgan erkaklar ularni uyushgan jinoiy guruhlarning rahbarlari va kriminal yetakchilar deb hisoblashlariga rozi emas. Norasmiy yetakchilar o‘zlarining uyushgan jinoyatchilikka aloqador emasligini isbotlash niyatida.
Avvalroq Tojikiston hukumati Tog‘li Badaxshonning norasmiy yetakchilaridan “jinoyatchilikka barham berish”ni talab qilgan, aks holda ularni jazo kutayotganini bildirgan edi. Ogohlantirish 22-oktabr kuni Tog‘li Badaxshonning yetti kriminal yetakchisi — Tolib Ayombekov, Mamadbokir Mamadbokirov, Yodgor Mamadaslomov, Xursand Mazorov, Munavvar Shanbiyev, Zoir Rajabov va Amriddin Alovatshoyevga topshirilgan.
Izoh (0)