Тожикистон Олий суди томонидан 28 йилга қамалган республика ИИВнинг наркотикларнинг ноқонуний айланишига қарши курашиш бошқармасининг собиқ раҳбари Файзулло Гадоев жорий йилнинг ёз мавсуми аввалида Ўзбекистонда қўлга олинган. Бу ҳақда «News.tj» хабар бермоқда.

Афғонистон наркотиларини Тожикистон ҳудуди орқали Ўзбекистонга ташиш билан икки қўшни мамлакатнинг ҳуқуқ-тартибот органлари бир неча йилдан бери шуғулланиб келган.

«Ҳибсга олиниш чоғида унинг ёнидан йирик наркотиклар партияси билан бирга катта миқдордаги пуллар ҳам топилган ва мусодара қилинган», — дейилади хабарда.

Ўзбекистон махсус хизматлари Файзулло Гадоевни Тожикистонга топширган.

Файзулло Гадоев Сурхондарё вилоятининг Сариосиё туманида туғилган.

У 2007 йилда Тожикистон ички ишлар вазирлигидан ишдан бўшатилганидан сўнг, республика ИИВ нафақахўри ҳисобланган.

Тожикистон Олий суди Ички ишлар вазирлиги Гиёҳвандлик моддалари ноқонуний айланишига қарши кураш бошқармасининг собиқ бошлиғи, милиция генерал-майори Файзулло Гадоевни 28 йилга озодликдан маҳрум этиш ҳақида ҳукм чиқарди.

Собиқ милиция мулозими мамлакат ЖКнинг беш моддаси, шу жумладан, ноқонуний наркотик айланмасида, йирик миқдорда пора олиш ва мансаб мавқеини суиистеъмол қилишда айбланган.

Тожикистон Олий суди судланувчининг мол-мулкини давлат фойдасига мусодара қилиш ҳақида ҳам ҳукм чиқарди. Шунингдек, Файзулло Гадоев давлат мукофотлари ва «милиция генерал-майори» унвонидан маҳрум этилди.