Самарқанд автомобиль заводида ишлаб чиқарилган паст полли SAZ LE 60 русумидаги шаҳар автобусларининг дастлабки партияси 27 октябрь куни «Тошшаҳартрансхизмат» компаниясига топширилди. Бу ҳақда ЎзА хабар бермоқда.
Шаҳар ички йўналишларига мўлжалланган ушбу автобус полининг пастлиги ҳамда йўловчиларни олиш ва туширишда шассининг пасайиши, яъни «книлинг» тизимининг мавжудлиги, имконияти чекланган йўловчиларга қўшимча қулайликлар яратилгани, кондиционер ўрнатилгани билан ажралиб туради. Автобуснинг умумий йўловчи сиғими 56 кишини ташкил этиб, 25 ўриндиқ ўрнатилган. Эуро-4 экологик стандартига жавоб берадиган Isuzu двигатели ўрнатилган.
2014 йилдан бери ишлаб чиқарилаётган ушбу моделдаги автобуслар айни вақтда Россия, Қозоғистон, Грузияга буюртма асосида етказиб берилмоқда. Шунингдек, Тошкент ва Самарқанд шаҳарларида ҳам синовдан ўтказилиб, йўналишларда фойдаланиш учун харид қилинмоқда.
«Корхонамиз битта SAZ LE 60 харид қилиб, тўрт йил йўналишда синаб кўрди. Фойдаланиш даврида автобуснинг техник имкониятлари ва йўловчилар учун қулайликлари атрофлича ўрганилиб, зарур таклифлар берилди, моделни такомиллаштириш чоралари кўрилди. Синов муваффақиятли ўтгач, энди 10 та янги автобус харид қиляпмиз», — деди Тошкентдаги 3-автобус саройи ходими Ғ.Мирзаев.
Самарқанд автомобиль заводи ва «Тошшаҳартрансхизмат» ўртасидаги шартномага кўра, завод 2018 йилда 80 та ЛЕ 60 автобусини етказиб бериши керак. 2019 йилда эса яна 200 та SAZ LE 60 автобуслари Тошкент шаҳри жамоат транспорти учун етказиб берилади.
Изоҳ (0)