Хитой ва Россия расмийлари Дональд Трампнинг телефони мазкур мамлакатлар махсус хизматлари томонидан эшитиб турилгани ҳақидаги The New York Times нашрида эълон қилинган мақолага муносабат билдирди. Кремль вакиллари вазиятга «юмор билан ёндашишгани»ни маълум қилган бўлса, Хитой ҳукумати АҚШ президентига айфон ўрнига Huawei смартфонларидан фойдаланишни тавсия қилди.
Хитой томонидан ушбу вазият юзасидан мамлакат Ташқи ишлар вазирлиги расмий вакили Хуа Чунйин хоним фикр билдирди. У Трампнинг телефони Хитой махсус хизматлари томонидан эшитиб турилгани ҳақидаги айбловларни рад этиб, ушбу ахборотни «фейк янгилик» намунаси деб атади. Чунйиннинг сўзларига кўра, агар Трамп хавфсизликни ўйлаб қайғураётган бўлса, у ҳолда айфонини Huawei’га алмаштиргани ёки барча коммуникацияларни ўчириб қўйгани маъқул.
Чунйиннинг бу сўзлари — нафақат АҚШ шаънига айтилган ҳазил, балки «коса тагида нимкоса» услубидаги бир киноя ҳам, чунки АҚШда Huawei қурилмалари савдоси тақиқланган. Тақиққа Huawei Хитой ҳукумати билан яқин ҳамкорлик қилиши ҳақидаги гап-сўзлар сабаб бўлган, бундан АҚШдаги барча давлат идоралари огоҳлантирилган. Табиийки, Трамп хоҳласа ҳам Huawei’дан фойдалана олмаган бўларди.
Россия томондан The New York Times’даги мақолага Путиннинг матбуот котиби Дмитрий Песков шарҳ берди. У ушбу масала юзасидан «эҳтимол, бу борада қандайдир батафсил ахборотга эга бўлган» нашрнинг ўзига мурожаат этишни тавсия қилди. Унинг таъкидлашича, Кремль ушбу газета «журналистлик масъулияти сустлашиб кетганига далил бўлгувчи бундай ахборотни ўйламай чоп этгани»дан афсусда.
24 октябрь куни The New York Times газетасида АҚШ президенти Дональд Трамп учта айфондан фойдаланиши, уларнинг иккитаси хафвсиз, лекин учинчиси хавфсиз эмаслиги ҳақида мақола чиққанди. Нашрнинг ёзишича, Трампнинг шахсий телефонини Хитой ва Россия махсус хизматлари эшитиб туриши мумкин.
The New York Times маълумотларига кўра, Хитой ҳукуматидан фарқли ўлароқ, Путиннинг АҚШ президентига нисбатан илиқ муносабатидан келиб чиқиб, Россияда Трампнинг телефонини эшитиб туриш учун катта бир манфаат йўқ. Бироқ Хитой махсус хизматлари икки мамлакат ўртасидаги савдо урушида Трампга таъсир кўрсата олиш учун «ҳар қандай далил»ни изламоқда.
Изоҳ (0)