Тошкент вилояти ҳокимлиги ташаббуси билан Оҳангарон шаҳрига медиа-тур ташкил этилди. Мақсад сўнгги 100 кун ичида шаҳарда амалга оширилган бунёдкорлик ва ободонлаштириш ишлари билан ОАВ вакилларини таништириш бўлди, дея маълум қилади «Xabar.uz».
Тошкент—Фарғона—Ўш орқали Хитойга туташувчи А-373 халқаро автомагистралининг Оҳангарон шаҳридан ўтувчи 5,8 километрлик қисмида катта миқёсдаги ободонлаштириш, бунёдкорлик ишлари олиб борилди.
«100 кун» сўзини алоҳида таъкидлагани бежиз эмас. Чунки охирги уч ойда Оҳангаронга келмаган одамда худди бошқа шаҳарга келиб қолгандек тасаввур уйғониши аниқ: тартибсиз, шаҳарсозлик меъёр ва қоидаларига амал қилинмаган ҳолда қурилган бино ва иншоотлар, уй-жойлар,йўл ёқасида ўзбошимчалик билан эгаллаб олиниб, маиший хизмат кўрсатиш объектларига айлантирилган қурилмалар ўрнини 5 ва 7 қаватли кўркам бинолар эгаллаган.
Атиги 2-3 ой муддатда тор йўллар кенгайтирилиб, чироқлар ўрнатилган, болалар майдончалари, спорт масканлари ва аҳоли учун зарур бўлган бошқа маиший бинолар қад кўтарди. Яроқсиз аҳволга келиб қолган шаҳар инфратузилмаси, газ, ичимлик суви ва электр тармоқлари янгиланди.
Маълум бўлишича, шаҳар инфратузилмасини мутлақо янгилаш, йўлларни кенгайтириш ҳамда кўп қаватли уйлар барпо этиш учун 192 та уйни бузишга тўғри келган. Уларнинг барчасига жами 34 миллиард сўмга яқин компенсация пуллари ўз вақтида берилган ва берилмоқда.
Тошкент вилояти ҳокимининг биринчи ўринбосари Қобил Ҳамдамовнинг айтишича, аҳоли аввалига бузилган уйлар учун шунча пул олишига ишонмаган, кейин эса ҳаммаси ўз ўрнига тушган: «Уй эгаларининг ҳар бири ўртача 200 миллион сўмдан олди. Нарх-наво масаласида тортишганимиз ҳам йўқ. Ҳаммани рози қилдик. Уйи бузилганлар вақтинча ижарага жойлаштирилган. Оҳангаронда ижара нархи бир ойга 200-300 минг, ҳаммасига бу учун олдиндан пул берилди, ҳеч ким норози бўлгани йўқ».
Оҳангарон шаҳри ҳокими Одилжон Жўраев журналистлар билан суҳбатда А-373 автомагистрал йўли бўйида намунали лойиҳалар асосида қурилаётган 24 та 5 қаватли тижорат уйларидаги ҳонадонларни мамлакатнинг исталган ҳудудидан келган киши ҳам бемалол харид қилиши мумкинлигини билдирди. Ушбу уйлардан сотиб олаётган вилоятликлар прописка билан боғлиқ муаммога дуч келмайди — истисно тариқасида рухсат этилган.
Қурилаётган 5 қаватли мазкур уйларнинг 1-қавати маиший хизмат кўрсатиш мажмуаси, 2-5-қавати турар-жой ҳисобланади. Улар 2 ва 3 хонадан иборат. Уйларнинг ташқи, яъни фасад қисми буюртмачиларнинг талабларидан келиб чиққан ҳолда, бир хилликдан қочиб, якка тартибда катта йўлнинг меъморий кўринишини комплекс равишда ҳисобга олиб, бир-бирини такрорламайдиган қилиб ишлаб чиқилган.
Хонадонлар ва савдо нуқталари харидорларнинг имкониятлари ва хоҳишига кўра, тўлиқ таъмирланган ёки таъмирланмаган ҳолда топширилиши ҳам мумкин. Масалан, харидор таъмирланмаган хонадонни ёки савдо дўконини сотиб олса, имконияти, диди, реал эҳтиёжи ва бошқа жиҳатлардан келиб чиқиб, ўзи мослаштириши мумкин. Бундай тажрибадан дунёнинг етакчи мамлакатларида кенг фойдаланилади ва бу амалиёт ҳар томонлама ўзини оқлаган.
Оҳангарон шаҳрида қурилаётган янги массив аҳолиси учун қатор қулайликлар ҳам яратилмоқда. Жумладан, уйларнинг теварагида мактабгача таълим муассасаси, спорт мажмуаси, маҳалла гузари, пиёдалар ва велосипед йўлакчаси, дам олиш жойлари, болалар майдончалари, автомобиль турар жойлари ва бошқа инфратузилма объектлари барпо этилмоқда. Муҳими, шаҳарнинг меъморий қиёфаси тубдан ўзгармоқда. Бу ўзгаришлар чиройи шаҳар аҳолисининг кайфиятида ҳам ўз аксини топмоқда.
Изоҳ (0)