Андижон шаҳридаги «Баркамол авлод» спорт ўйингоҳида «Мардона яшамоқ, Ватанни асрамоқ – чин инсон бахти!» шиори остида ҳарбий техникалар кўргазмалари, парадлар ва таниқли эстрада хонандалари иштирокида ёшлар фестивали ўтказилди. Бу ҳақда Андижон вилояти ИИБ матбуот хизмати хабар қилди.
Ёшларни ватанпарварлик руҳида тарбиялаш, аҳолининг ҳуқуқий саводхонлигини ошириш мақсадида вилоят ҳокимлиги, ички ишлар, адлия, фавқулодда вазиятлар, мудофаа бошқармалари ва бир қатор корхона, ташкилот ҳамда муассасалар томонидан ташкил этилган фестивалда шаҳардаги мактабгача таълим муассасалари тарбияланувчилари, умумтаълим мактаблари, академик лицей ва касб ҳунар коллежларининг ўқувчилари иштирок этди.
Фестиваль қатнашчилари ва меҳмонларни Андижон вилояти ҳокими Шуҳратбек Абдураҳмонов қизғин табриклади. Тадбирда Мудофаа вазирлигининг махсус вазифаларни бажарувчи харбийлари, вилоят ИИБнинг кинология хизмати, тезкор вазифаларни бажарувчи сафарбар отряд ҳамда махсус отряд сапёрлари, ёнғин хавфсизлиги бошқармаси, Миллий гвардия ходимлари томонидан намойиш этилган ҳарбий техника, жанговор қуроллар, улардан фойдаланиш жараёнлари, кўргазмали чиқишлар барчанинг олқишларига сазовор бўлди.
Изоҳ (0)