Жорий йилнинг 20 апрелида Ўзбекистон Республикаси Президентининг «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида»ги фармони имзоланган эди, дейилади Давлат хизматлари агентлиги Сирдарё вилоят бошқармаси хабарида.
Акцияда иштирок этиб, ноқонуний қурилган турар жойларни қонунийлаштириб, ўз мулкларини эркин тасарруф этиш мумкин. Яъни улар турар-жойни сотиш, алмаштириш, ҳадя қилиш, мерос қилиб қолдириши мумкин бўлади.
Фармон ижроси юзасидан ишларни ташкил этиш бўйича республика ва Қорақалпоғистон Республикаси, вилоятлар ва Тошкент шаҳар, туман (шаҳар) комиссиялари тузилди.
Комиссия аъзолари ўртасида ахборот алмашиниш идоралараро электрон ҳамкорлик тизими орқали йўлга қўйилган. Бу эса фуқароларнинг мурожаатлари ўз вақтида ва сифатли амалга оширилишини таъминлаши керак эди. Фуқаро туман (шаҳар) Давлат хизматлари марказига ариза билан мурожаат этиши билан фуқаронинг ҳаракати тўхтаб, ҳужжатлар электрон ҳаракатланишни бошлаши, ишчи гуруҳ томонидан масала ҳал этилгач, тайёр ҳужжатлар яна электрон шаклда Давлат хизматлари марказига келиб тушиши, фуқаро эса белгиланган суммани тўлаб, давлат органлари фаолиятидан рози бўлиб, тайёр ҳужжатларни олиб чиқиб кетиши лозим.
Бироқ шундай имконият яратилган бўлса-да, айрим давлат идора ва ташкилотларида «эски ҳаммом, эски тос», дейилади хабарда.
Кўчмас мулкка нисбатан мулк ҳуқуқини эътироф этиш бўйича бир марталик умумдавлат акцияси доирасида кўчмас мулкларга нисбатан мулк ҳуқуқини эътироф этиш учун Сирдарё вилояти бўйича 1 638 та аризалар келиб тушган бўлиб, шундан фақат 311 та мурожаат бўйича мулк ҳуқуқини эътироф этиш бўйича туман (шаҳар) ҳокимларининг қарорлари чиқарилишига эришилган бўлса, 124 та мурожаатга эса рад хулосалари берилган.
Сирдарё вилоятининг Гулистон шаҳрида 136 та (мурожаатлар сони 577 та), Ширин шаҳрида 8 та (мурожаатлар сони 15 та), Янгиер шаҳрида 8 та (мурожаатлар сони 27 та), ва Боёвут туманида 14 та (мурожаатлар сони 186 та), Гулистон туманида 25 та (мурожаатлар сони 71 та), Мирзаобод туманида 52 та (мурожаатлар сони 235 та), Оқолтин туманида 0 та (мурожаатлар сони 39 та), Сардоба туманида 0 та (мурожаатлар сони 38 та), Сайхунобод туманида 35 та (мурожаатлар сони 114 та), Сирдарё туманида 33 та (мурожаатлар сони 245 та), Ховос туманида 0 та (мурожаатлар сони 91 та) ноқонуний уй-жойга нисбатан (мурожаатлар сони 311 та) мулк ҳуқуқи эътироф этиш ҳақида ҳоким қарори қабул қилинган, холос.
Қонун бузилишлар 282 та улардан муддати бузилганлар сони 273 та, маъмурий жазога тортилганлар сони 5 та, тақдимнома асосида интизомий жазога тортилганлар 4 та.
Хулоса ўрнида: жорий йилнинг тўққиз ойи давомида Сирдарё вилояти бўйича туман (шаҳар) давлат хизматлари марказларига келиб тушган аризалар 1638 тани ташкил этган бўлса-да, улардан атига 311 таси ҳоким томонидан қарорлар қабул қилинган, 124 таси рад этилган, иш жараёнидагилар 767 тадан иборат бўлиб, қолган 436 таси бир марталик йиғимни тўлаши учун юборилган ҳисобварақ-фактураларни ташкил этмоқда.
Изоҳ (0)