9 октябрь куни Елисей саройида Шавкат Мирзиёев ва Франция президенти Эммануэль Maкрoннинг учрашуви бўлиб ўтди. Бу ҳақда Президент матбуот хизмати маълум қилди.
Шавкат Мирзиёев Эммануэль Maкрoнга Францияга таклифи ҳамда Ўзбекистон делегациясига кўрсатилаётган меҳмондўстлик учун самимий миннатдорлик билдирди.
Ўзбекистон ишончли ва истиқболли шерик бўлган Франция билан ҳамкорликни ривожлантиришга катта аҳамият қаратаётганини алоҳида таъкидлади.
Франция расмий ташриф билан келган Европадаги биринчи мамлакати эканини қайд этиб, икки мамлакатни Амир Темур ва Франция қироли Карл VI давридан буён ўрнатилган ўзаро ҳурмат ва савдо алоқалари боғлаб турганига эътибор қаратди.
Давлат раҳбарлари минтақада тинчлик ва осойишталикни таъминлашнинг муҳим шарти сифатида Афғонистондаги вазиятни барқарорлаштириш зарурлигини яна бир бор таъкидлаб, бунда олдиндан ҳеч қандай шарт қўймасдан можаронинг барча томонлари ўртасида тўғридан-тўғри сиёсий мулоқотни таъминлаш ушбу муаммони ҳал этишнинг бирдан бир йўли эканини қайд этди.
Кейинги йилларда сиёсий мулоқот фаоллашгани ва бундан буён мунтазамлик касб этиши лозимлиги таъкидланди.
Савдо-иқтисодиёт, инвестиция, энергетика, технологиялар, маданий-гуманитар соҳаларда ҳамкорликни ривожлантириш масалалари батафсил муҳокама қилинди.
Савдо-иқтисодий ҳамкорлик бўйича Ўзбекистон—Франция ҳукуматлараро комиссияси фаолиятига алоҳида аҳамият қаратилди. Ўзаро савдо ҳажмини кўпайтириш, иқтисодиётнинг турли тармоқларида истиқболли инвестиция лойиҳаларини амалга ошириш муҳимлиги қайд этилди.
Учрашувда маданият ва санъат, туризм, фан ва техника, таълим, соғлиқни сақлаш, археология соҳаларида ҳамкорликни кенгайтириш масалалари ҳам муҳокама қилинди.
Давлат раҳбари Ўзбекистонга келаётган франциялик туристларга нисбатан визасиз тартиб жорий этилгани ва Франция бу борада Европанинг биринчи мамлакати бўлганини таъкидлади.
Иқтисодиёт, муҳандислик иши, қишлоқ хўжалиги, туризм каби йўналишлар бўйича мутахассислар тайёрлаш мақсадида Ўзбекистонда Страсбург университети ва Пантеон Сорбонна университети Париж академияси филиалларини очиш борасида келишувларга эришилди.
Мамлакат тарихий ва маданий меросига улкан қизиқишни ҳисобга олиб, 2021 йилда Лувр музейида Ўзбекистон тарихига бағишланган кўргазма ўтказиш хусусида келишувга эришилди. Бу МДҲ мамлакатларидан бирига бағишлаб Луврда ўтказиладиган илк шундай тадбир бўлади.
Ташриф давомида автомобиль транспортида ташиш, туризм, ҳарбий-техникавий ҳамкорлик, техник кўмак, космосни тадқиқ этиш, инвестиция лойиҳаларини молиялаштириш, маданият ва бошқа соҳаларга оид 10 ҳукуматлараро ва идоралараро ҳужжатлар имзоланди.
Музокаралар якунида ҳужжатлар ўзаро алмашилди.
Изоҳ (0)