«Ўзбекнефтгаз» АЖ Ҳиндистоннинг йирик нефть-газ корпорацияси ҳисобланмиш ОNGC’нинг ОNGC Videsh Limited шўъба компанияси билан ҳамкорлик битимини имзолади. Бу ҳақда «Ўзбекнефтгаз» АЖ матбуот хизмати хабар берди.
«Ўзбекнефтгаз» АЖ делегацияси Шавкат Мирзиёевнинг жорий йилнинг 30 сентябрь — 1 октябрь кунлари Ҳиндистонга давлат ташрифи арафасида ўтказилган бизнес форумда иштирок этди. Мазкур форумда Ўзбекистоннинг давлат идоралари ва бизнес ҳамжамиятининг 100 дан ортиқ вакиллари қатнашди. Шунингдек, «Ўзбекнефтгаз» акциядорлик жамияти вакиллари «Ўзбекистонда ишлаб чиқарилган» номи остида Нью-Делида ўтказилган Миллий маҳсулотлар кўргазмасида ҳам иштирок этдилар.
Ташриф доирасида «Ўзбекнефтгаз» АЖ вакили ОNGC Videsh Limited компаниясининг геологик қидирув ишлари бўйича директори Судхир Шарма билан музокаралар ўтказди. Томонлар Ўзбекистон Республикаси ва хориждаги сармоявий блокларда геологик қидирув ишларини олиб бориш борасида икки томонлама ҳамкорликни ривожлантириш истиқболларини муҳокама этдилар.
Музокаралар якунида томонлар Ҳамкорлик битими ва Maxфийлик шартномасини имзолаш борасида қарор қабул қилди. Мазкур ҳужжатларга кўра, 4 ой мобайнида томонлар Ўзбекистон Республикаси сармоявий блоклари тўғрисида ахборот алмашиб, уни замонавий дастурий таъминот маҳсулотлари ёрдамида ўрганиб чиқадилар ва ОNGC Videsh Limited компанияси тажрибаси билан батафсил танишиб, ҳамкорлик бўйича аниқ таклифларни биргаликда ишлаб чиқади.
Таъкидлаш жоиз, 1965 йилда ташкил этилган ОNGC Videsh Limited компанияси Ҳиндистоннинг Миллий нефть ва табиий газ корпорациясига қарашли шўъба компания ва чет эл бўлими ҳисобланади.
Изоҳ (0)