Тошкентдаги энг йирик савдо-кўнгилочар марказ — Samarqand Darvoza яқинида яна бир кўп қаватли автомобиллар тўхташ жойи қурилади, деб ёзади «Podrobno.uz».
«Савдо-кўнгилочар марказини қуришда биз ташрифчилар учун қулайлик яратиш мақсадида автотураргоҳ барпо этиш масаласини кўриб чиққанмиз. Кўп қаватли тураргоҳларни лойиҳалаштириш ва қуриш қунт талаб қиладиган ва сермашаққат иш бўлгани учун, биз ушбу соҳадаги сўнгги ютуқларни қўллашга ҳаракат қилдик», — деди марказ директори Бобир Ёқубов.
Унинг сўзларига кўра, қурувчилар мавжуд ердан оқилона фойдаланди. Масалан, 600 та автомобилни сиғдириш учун камида 21 минг квадрат метр ҳудуд талаб этилади. Олти қаватли тураргоҳ эса 3 минг квадрат метр жойни эгаллайди.
Бундан ташқари, қурилишда монолит технология қўлланилди, бу конструкциянинг мустаҳкамлигини оширади ва 9—10 баллгача зилзилага бардош бериш имконини беради.
Қўшимча қулайликлар сифатида мотоцикл ва велосипедлар учун жойлар кўзда тутилган. Шунингдек, биринчи қаватда автомобилларни ювиш шохобчаси бўлади.
Бобир Ёқубовнинг айтишича, тахминий ҳисоб-китобларга кўра, автотураргоҳ 2020 йилда фойдаланишга топширилади.
Изоҳ (0)