Шамол ресурсларидан арзон электр энергиясини олиш мумкин. Шу боис Сурхондарё вилоятида аҳоли ҳамда саноат ишлаб чиқаришни арзон энергия билан таъминлаш мақсадида шамол энергетикасини ривожлантириш бўйича йирик лойиҳаларни қўллаб-қувватлашга алоҳида эътибор қаратилмоқда. Бу ҳақда «Дарё»га Сурхондарё вилояти ҳокимлиги матбуот хизмати хабар берди.
Вилоят ҳокими Баҳодир Пўлатов ҳамда Туркиянинг Etka Co Enerji AŞ ҳамда Тошкентдаги Shams илмий маркази вакиллари Зулфиқор Устунгар ва Зафар Шерматов ўртасида ўтказилган мулоқотда ушбу компания томонидан Бойсун туманида 600 мВт электр энергияси ишлаб чиқариш қувватига эга бўладиган шамол энергиясини ишлаб чиқариш лойиҳаси ҳақида сўз юритилди.
Мулоқотда Etka Co Enerji AŞ компанияси Shams илмий маркази билан ҳамкорликда Бойсун туманининг денгиз сатҳидан 1500-1700 метр баландликда жойлашган тоғли ҳудудида шамол электр станциясини қуриш ва муқобил электр энергия ишлаб чиқариш учун умумий қиймати 5 млрд. 190 млн. АҚШ доллари миқдорида тўғридан-тўғри инвестиция киритиш, шамол энергияси ускуналари ва жиҳозларини ўрнатиш, лойиҳа ишга тушгач ишлаб чиқарилган электр энергияни ҳозиргидан 10 фоиз арзонлаштирилган ҳолда сотиш, шунингдек, лойиҳани амалга ошириш билан боғлиқ бошқа ташкилий масалалар келишиб олинди.
Ушбу йирик лойиҳани 2020 йилгача фойдаланишга топшириш режалаштирилаётган бўлиб, бунинг натижасида Бойсун ва Шеробод туманларидаги истеъмолчиларни муқобил электр энергияси билан узлуксиз таъминлаш сифати янада ошади.
100 дан ортиқ янги иш ўрни яратилади.
Изоҳ (0)