Ўзбекистон Республикаси Президентининг «Республика иқтисодиёти тармоқлари ва ижтимоий соҳаларини 2018—2019 йиллар куз-қиш даврида барқарор ишлашга комплекс тайёрлашни таъминлаш чора-тадбирлари тўғрисида»ги қарори ижроси юзасидан жорий йил 21 июлда Самарқанд вилояти ҳокимининг қарори қабул қилинган эди, дейилади «Zarnews.uz» хабарида.
Ушбу ҳужжатнинг 1-иловасида 62 банддан иборат чора-тадбирлар режаси бўлиб, куз-қиш мавсумига тайёргарлик бўйича барча йўналишлардаги ишлар муддатлари билан белгилаб берилган. Хусусан, 1 октябрга қадар кўп хонадонли уйларнинг томини ёпиш, жорий ва мукаммал таъмирлаш кўзда тутилган.
Шунингдек, уй-жойларнинг кириш йўлаклари, ертўлалардаги муҳандислик коммуникация тармоқлари, фасад қисмини таъмирлаш, болалар майдончаси қуриш ишлари ҳам шу санагача тугатилиши лозим эди.
Хўш, Жомбой туманидаги кўп қаватли уйларда куз-қиш мавсумига тайёргарлик қандай? — деган масала кўтарилади хабарда.
«Очиғи, ўтган йили кўп қаватли уйлардаги аҳволни ўрганганимизда аянчли ҳолат — барча канализация қувурлари ертўлага тушишига гувоҳ бўлгандик. Хусусан, Гулистон маҳалласидаги бир қатор кўп қаватли уйлардаги антисанитар ҳолат чидаб бўлмас даражага келиб қолган эди. Энди-чи, жомбойликлар ҳали ҳам канализациясиз уйларда яшамоқдами ёки аҳвол ўзгардими?», — дейилади хабарда.
Тумандаги кўп қаватли уйларнинг аксариятида том қисми таъмирдан чиққан. Айрим уйларда таъмирлаш ишлари ҳозиргача давом этмоқда. Мутасаддилар таъмирлаш ишлари 1 ноябргача якунга етказилишини маълум қилди. Мисол учун, «Жомбой Лолазор коммунал сервис» уй-жой мулкдорлари ширкати тасарруфидаги 6-уйнинг том қисми тўлиқ профнастил билан қопланган (ўтган йилги энг хароб уйлардан бири), фасад қисми, йўлаклар ҳам таъмирланган. Аммо унинг ёнгинасидаги 7-уйда бу ишлар ҳали давом этмоқда.
«Жомбой шодлик коммунал сервис» ширкатида 5 та кўп қаватли уй бор. Иккитасининг том қисми мукаммал, барчасининг фасад ва кириш йўлаклари капитал таъмирдан чиқарилган бўлиб бунинг учун 369 миллион сўмлик банк кредити сарфланган. Уйларнинг олд қисмида салкам 1500 квадрат метр жой бетон билан қопланган. Шунингдек, «Ишончли хизмат» ширкати ҳудудидаги яна бир кўп қаватли уйнинг ҳам том қисми мукаммал таъмирланган.
Умуман, туманда куз-қиш мавсумига тайёргарлик, кўп қаватли уйларнинг том, фасад, ертўла, кириш йўлаклари, олд йўлакларини таъмирлаш каби ишларга 963 миллион сўм маблағ сарфланган. Аҳолининг бу йил ёғин-сочинли кунларда уйига чакка ўтишидан хавотири йўқ.
– Тез фурсатда уйимизда катта ўзгаришлар бўлди, — дейди 6-кўп қаватли уйда яшовчи Гулчеҳра Абдусаматова. – Энг аввало, уйларда ичимлик суви бор. Олдин бундан азоб чекардик. Иккинчидан, уйлар олдидаги ноқонуний қурилмалар олиб ташланди. Томдан сув ўтмайдиган бўлди. Уй ҳовлисига бетон ётқизилди. Тунги чироқлар ҳам ўрнатилди, хурсандмиз. Аммо ҳали ҳамон канализация муаммосига ечим бўлармикан деб кутиб турибмиз.
Жомбойда ҳамон ертўласидаги барча эшиклари-ю туйнуклари бетон билан ёпиб ташланган, умуман ҳаво кирмайдиган кўп қаватли уйлар бор. Мисол учун, Гулистон маҳалласида жойлашган икки қаватли 5-уйнинг ертўласи – канализация қудуғи. Бир қатор уйларда бундан 15 йил олдин муҳандислик коммуникация тармоқлари ишдан чиққач, ертўла чиқиндига тўла бошлаган, йиллар давомида мурожаатлар ҳеч қандай натижа бермагач, аҳоли шунчаки ертўлани ҳаво чиқмайдиган қилиб ёпиб ташлаган.
– Бу ҳақда матбуотда бонг урилгандан сўнг, жуда катта ўзгаришлар амалга оширилди ,– дейди туман уй-жой коммунал хизмат кўрсатиш бўлими бошлиғи Маҳмуд Абдураҳимов.
– Гулистон маҳалласига хизмат кўрсатувчи 4 та уй учун канализация қудуғи қуриб битказилди. Уйлардан қувурлар ҳам тортиб келинди. Ҳозир фойдаланишга топшириш арафасидамиз. Энг муҳими, тумандаги канализация муаммосини бартараф этиш, барча уйлардаги тармоқларни янгилаш учун 3 миллиард сўм маблағ ажратилган. Туман марказида бутунлай шу муаммога барҳам бериш учун 3 километр канализация тармоғи қуриш режалаштирилган бўлса, 2 километри тортиб бўлинди. Аҳолини узоқ вақт қийнаб келган бу муаммо шубҳасиз бу йил ҳал этилади.
«Хуллас, мазкур муаммо ечими бўйича амалга оширилган ишларни албатта қадрлаймиз. Ҳозирча эса, таҳририятни ҳам, аҳолини ҳам сўнгги савол жавоби қизиқтириб турибди: қачон уйлар канализацияга уланади?» — дея мақолага хулоса ясалади.
Изоҳ (0)