Адлия вазирлиги томонидан Буюк Британиянинг Ўзбекистондаги элчихонаси билан ҳамкорликда турли соҳалар (тадбиркорлик, ижтимоий ҳимоя, ҳуқуқий ҳимоя ва ҳоказо) бўйича бепул маслаҳат берадиган «Advice.uz» ягона маълумотлар порталини яратиш ишлари бошланди. Бу ҳақда «Дарё»га вазирлик матбуот хизмати маълум қилди.
Мазкур портални муваффақиятли ишга тушириш мақсадида Президент администрацияси ва Адлия вазирлиги вакилларидан иборат делегациянинг Лондонга сафари уюштирилди.
Сафар давомида Британиянинг фуқароларга маслаҳат бериш бўйича энг яхши амалиётлари, хусусан, 1939 йилда фаолиятини бошлаган Citizens Advice тармоғи фаолияти билан яқиндан танишилди.
Citizens Advice Британиянинг мамлакат бўйича 316 мустақил хайрия ташкилотлари тармоғи ҳисобланади.Тизим орқали ижтимоий ёрдам, меҳнат муносабатлари, қарздорлик, исътемолчиларнинг ҳуқуқларини ҳимоя қилиш, оила, уй-жой, суд-ҳуқуқ, миграция соғлиқни сақлаш каби соҳаларда электрон портал, телефон, электрон ва Webchat хизмати ёрдамида бепул маълумот ва маслаҳатлар тақдим этади.
Бундан ташқари, Citizens Advice’нинг Буюк Британия ҳудудида 600 дан ортиқ бюроси мавжуд бўлиб, уларга аҳоли ўзининг муаммоси бўйича бепул маслаҳат олиш учун мурожаат қилиши мумкин.
Cафар давомида Ўзбекистон делегациясининг Фуқаролар маслаҳатлари бюроси миллий уюшмаси, мазкур уюшма билан ҳамкорлик қилувчи Буюк Британия ҳукуматининг электрон ҳукумат тизимини ривожлантириш бўйича хизмати, Бизнес, энергетика ва саноат стратегияси департаменти ҳамда Буюк Британияда мустақил маслаҳат хизматлари тармоғини қўллаб-қувватловчи AdviceUK хайрия ташкилоти вакиллари билан учрашувлар бўлиб ўтди.
Учрашувлар доирасида делегация аъзолари ва хорижий ташкилот вакиллари ўртасида «Advice.uz» Ягона ахборот портали лойиҳасини Ўзбекистонда ишга тушириш истиқболлари бўйича фикрлар алмашилди.
Citizens Advice вакиллари мазкур лойиҳани амалга оширишда керакли бўлган барча ахборот ресурсларини тақдим этиш, эксперт ёрдамини кўрсатиш орқали Адлия вазирлиги билан ҳамкорлик қилишга тайёр эканини билдирди.
Government Digital Services вакиллари билан бўлган учрашувда ахборот технологиялари, хусусан, мазкур порталнинг веб платформасини ишлаб чиқиш бўйича ҳамкорлик қилишга қарор қилинди. Томонлар Ўзбекистон делегациясининг келгуси сафарида ҳамкорлик меморандумини имзолашга келишишди.
Маълумот учун, бепул маслаҳат берувчи веб-порталнинг яратилиши фуқароларнинг арзимаган масалалар бўйича турли идораларга мурожаат қилишини кескин камайтириши билан биргаликда, кундалик ҳаётда дуч келиши мумкин бўлган турли муаммоли масалаларнинг қонуний ечимини топишини таъминлайди.
Изоҳ (0)