Bugun Fransiyada 500 dan oshiq o‘zbek istiqomat qilmoqda. Ular turli sohalarda o‘qiydi va faoliyat olib boradi. O‘zbekistonlik talabalar Fransiyada asosan iqtisodiyot, huquq, me’morchilik, qishloq xo‘jaligi sohalari bo‘yicha ta’lim oladi. O‘zining yuksak salohiyati va iste’dodi evaziga shu yerda ishlab, tajriba to‘playotgan o‘zbekistonliklar ham ko‘p, deb yozadi O‘zA.
Joriy yil boshida Parijda istiqomat qilayotgan o‘zbekistonliklar “Meros” assotsiatsiyasini tuzdi. Ular o‘zbek milliy qadriyat va an’analarini o‘zida aks ettirgan turli madaniy-ma’rifiy tadbirlar o‘tkazib keladi.
Shuningdek, assotsiatsiya O‘zbekistondan borib Fransiyada faoliyat yuritayotgan, o‘qiyotgan yoshlarni birlashtirib, o‘zbek madaniyati, an’analarini targ‘ib qilish bilan shug‘ullanadi. Tadbirlarga fransiyaliklar ham jalb qilib turiladi. Ularga O‘zbekistondagi turli sohalarda yaratilgan sharoitlar, o‘zbek oshxonasi haqida ma’lumotlar berib boriladi.
“Tadbirlar asosan milliy madaniyatimizning targ‘ibotiga bag‘ishlanadi, — deydi assotsiatsiya raisi Farruhbek Yo‘ldoshev. — Yaqinda bo‘lib o‘tgan tadbirimiz Alisher Navoiy va Zahiriddin Muhammad Bobur ijodiga bag‘ishlandi. Tadbirda nafaqat yurtdoshlarimiz, balki, fransiyaliklar ham faol ishtirok etdi. Bu kabi tadbirlarni o‘tkazishda O‘zbekistonning Fransiyadagi elchixonasi bilan faol hamkorlikni yo‘lga qo‘yganmiz”.
Andijonlik Farruhbek Yo‘ldoshev Andijon Muhandislik va iqtisodiyot institutini tugatgan. Parijdagi Ecol Central de Paris muhandislar maktabini tamomlagan. O‘qishni tugatib avtomobil industriyasi bo‘yicha faoliyat boshlagan. Ayni kunda avtomobil ishlab chiqarish sohasida faoliyat olib bormoqda.
Izoh (0)