Сурияда ҳарбий операция олиб борилаётган уч йил ичида 112 нафар россиялик ҳарбий ҳалок бўлди. Бу ҳақда Россия Федерация Кенгашининг мудофаа ва хавфсизлик бўйича қўмитаси раиси Виктор Бондарёвга таяниб, «Интерфакс» хабар берди.
«Айни вақтда Қуролли кучларимизнинг Суриядаги талафоти 112 кишини ташкил қилади, буларнинг деярли ярми Ан-26 ҳалокати ва уриб туширилган Ил-20 улушига тўғри келади. Техникадан 8 та самолёт, 7 та вертолёт ва, эҳтимол, бир-иккита БТР ва зирҳли автомобиль йўқотилган», — дея аниқлик киритди у.
Талафотлар ҳақида гапирар экан, сенатор Афғонистондаги урушни эсга олди. Ўшанда, унинг аниқлик киритишича, уч йил ичида 4,8 минг киши ҳалок бўлган. «‘Прогрессив Ғарб’ билан ҳам таққослаймиз: Ироқдаги урушнинг уч йили ичида (2003—2006) Америка коалицияси 2515 нафар ҳарбий хизматчини (шунинг 2309 нафари АҚШники), 10—20 та ‘Abrams’ танкларини, бир неча ўнлаб БТРларни, камида 50 та ‘Бредли’ БМПларни, 15 та самолёт ва 80 га яқин вертолётларини йўқотган», — деди Бондарёв.
Изоҳ (0)