Ўзбекистонлик 22 нафар ёш иқтидор Мадрид шаҳрига етиб борди ҳамда «Реал» футбол академиясида машғулотларга киришди. Бу ҳақда ЎФА матбуот хизмати хабар берди.
Қайд этилишича, 2004—2008 йиллар оралиғида таваллуд топган футболчилар аввалига Ўзбекистон футбол ассоциацияси томонидан экипировкалар қабул қилиб олган. Мадрид шаҳрида эса улар «Реал» академиясига тегишли формалар билан сийланди. Эндиликда мазкур футболчилар «Реал» футбол клуби тарихи, ютуқлари билан яқиндан танишиш, унинг жаҳонга машҳур академияси фаолиятини ўрганиши, испаниялик бошқа мутахассислар қўл остида машғулот ўтказиши мумкин бўлади.
Ўзбекистон футбол ассоциацияси мамлакат футболидаги ёш иқтидорларни ҳар йили шунга ўхшаш лойиҳалар билан қамраб олишни режалаштирган.
Маълумот учун, йил бошида ЎФА раҳбариятининг Испанияга қилган ташрифидан кейин «Реал» футбол академияси билан ҳамкорлик алоқаси йўлга қўйилганди. Бунинг мантиқий давоми сифатида шу йилнинг июнь ойида академиянинг уч мутахассиси Тошкентга келиб, икки ҳафта давомида ўзбекистонлик 300 нафар футболчи бўлиш орзусидаги болалар билан машғулот ўтказди.
Бунда Ўзбекистон футбол ассоциацияси ҳар бир вилоятга тенг квота ажратиб, 300 нафар иқтидор эгалари бир қатор спорт шартлари асосида саралаб олинди. «Реал» академияси билан танишиш истагида бўлган болакайлар орасида соғлом рақобат бўлиши ҳамда таниш-билишчиликнинг олди олиниши муҳим фактор ҳисобланарди. Тошкентда бўлган уч мутахассис 300 нафар тарбияланувчи орасидан 22 нафарини ўзи танлаб олди ва бу ишга ЎФА мутахассислари аралаштирилмади. Сентябрь ойи сўнгида эса ЎФА ўз ҳисобидан мазкур иқтидор эгаларини Мадридга жўнатди.
Изоҳ (0)