O‘zbekistonlik 22 nafar yosh iqtidor Madrid shahriga yetib bordi hamda “Real” futbol akademiyasida mashg‘ulotlarga kirishdi. Bu haqda O‘FA matbuot xizmati xabar berdi.
Qayd etilishicha, 2004—2008-yillar oralig‘ida tavallud topgan futbolchilar avvaliga O‘zbekiston futbol assotsiatsiyasi tomonidan ekipirovkalar qabul qilib olgan. Madrid shahrida esa ular “Real” akademiyasiga tegishli formalar bilan siylandi. Endilikda mazkur futbolchilar “Real” futbol klubi tarixi, yutuqlari bilan yaqindan tanishish, uning jahonga mashhur akademiyasi faoliyatini o‘rganishi, ispaniyalik boshqa mutaxassislar qo‘l ostida mashg‘ulot o‘tkazishi mumkin bo‘ladi.
O‘zbekiston futbol assotsiatsiyasi mamlakat futbolidagi yosh iqtidorlarni har yili shunga o‘xshash loyihalar bilan qamrab olishni rejalashtirgan.
Ma’lumot uchun, yil boshida O‘FA rahbariyatining Ispaniyaga qilgan tashrifidan keyin “Real” futbol akademiyasi bilan hamkorlik aloqasi yo‘lga qo‘yilgandi. Buning mantiqiy davomi sifatida shu yilning iyun oyida akademiyaning uch mutaxassisi Toshkentga kelib, ikki hafta davomida o‘zbekistonlik 300 nafar futbolchi bo‘lish orzusidagi bolalar bilan mashg‘ulot o‘tkazdi.
Bunda O‘zbekiston futbol assotsiatsiyasi har bir viloyatga teng kvota ajratib, 300 nafar iqtidor egalari bir qator sport shartlari asosida saralab olindi. “Real” akademiyasi bilan tanishish istagida bo‘lgan bolakaylar orasida sog‘lom raqobat bo‘lishi hamda tanish-bilishchilikning oldi olinishi muhim faktor hisoblanardi. Toshkentda bo‘lgan uch mutaxassis 300 nafar tarbiyalanuvchi orasidan 22 nafarini o‘zi tanlab oldi va bu ishga O‘FA mutaxassislari aralashtirilmadi. Sentabr oyi so‘ngida esa O‘FA o‘z hisobidan mazkur iqtidor egalarini Madridga jo‘natdi.
Izoh (0)