Фарғонада «Ўзбекистон–Жанубий Корея дўстлик ўқув маркази» ташкил этилди. Бу ҳақда «Дарё» мухбири Азизжон Эрматов хабар берди.
Марказда Жанубий Кореяда ишлаш истагида бўлган фуқароларга корейс тили ва қадриятлари чуқурлаштирилган тарзда ўқитилади. Ўқув хоналари замонавий технологиялар, кўргазмали воситалар, ўзбек-корейс тили луғатлари, адабиётлар билан тўлиқ таъминланган.
Ўқув марказининг тантанали очилиш маросимида Фарғона вилояти ҳокими Шуҳрат Ғаниев, Жанубий Кореянинг Evergreen Motors Group компанияси бошқаруви раиси Ким Чанг Кеонг бошчилигида вилоятга ташриф буюрган делегация вакиллари иштирок этди.
– Тошкентдан сўнг Фарғонада ҳам бу каби ўқув маркази очилди. Ўқув марказида бир вақтнинг ўзида 300–350 нафар ўқувчига корейс тилини ўргатамиз. Марказда тил ўргатиш билан бирга корейс миллий қадриятлари ҳақида ҳам тўлиқ маълумот берилади. Услубчи ва мутахассислар Кореядан олиб келинади. Корейс тилини мукаммал биладиган маҳаллий ўқитувчилар ҳам танлов асосида ишга қабул қилинади. Жанубий Кореяда ишлаш учун тест синовларининг биринчи босқичи шу ернинг ўзида топширилади, – дейди ўқув маркази директори Ким Ёнг Бок.
Очилиш маросимида қўшни республикаларнинг Боткент, Ўш, Хўжанд вилоятлари аҳолиси ҳам ушбу марказда корейс тилини ўрганиши мумкинлиги таъкидланди. Тез орада Нукус, Қарши ва Бухоро шаҳарларида ҳам шундай ўқув марказлари ташкил этилиши маълум қилинди.
Изоҳ (0)