АҚШ Россиянинг 12 та компаниясига нисбатан санкциялар киритади

АҚШ савдо вазирлиги 12 та Россия компаниясига нисбатан санкциялар киритишга қарор қилди, деб ёзади «Дождь». Тегишли ҳужжат Федерал реестр сайтида эълон қилинди.

Чекловлар «Аэрокомпозит», «Дайвтехносервис», «Гамма» илмий-ишлаб чиқариш корхонаси, «Вектор» ИТИ, «Nilco Group, «Сайрус Системс», «Вега» ИТИ каби компанияларга тегишли бўлади. Уларнинг барчаси Entity list рўйхатига киритилади ва уларга нисбатан қўш мақсадли Америка маҳсулотлари экспортини рад этиш презумпцияси амал қилишни бошлайди.

Ҳужжатда айтилишича, ушбу компаниялар АҚШ миллий хавфсизлигига таҳдид солади ва унинг ташқи сиёсий манфаатларига зид тушади. Nilco Group Эрон ракета дастурига моддий кўмак бериши, «Вектор», «Гамма», «Сайрус Системс» компаниялари эса киберҳужумларга алоқадорлиги туфайли санкцияларга дучор бўлди.

Ҳужжат 26 сентябрь куни расман эълон қилинади ва кучга киради.