«Оила» илмий-амалий тадқиқот маркази Фарғона вилояти бошқармаси томонидан жорий йилнинг ўтган даврида ажрашиш арафасидаги 1826 оила яраштирилди. Бу ҳақда «Дарё» мухбири Азизжон Эрматов хабар берди.
«Оила» марказининг Фарғона вилоят бошқармаси ва ҳудудий бўлинмалари томонидан ёшларни оилавий ҳаётга тайёрлаш, оиладаги низоли ҳолатларни ҳал қилишнинг ҳуқуқий ва психологик асосларини ўргатиш, ажримларнинг олдини олиш борасида бир қатор ишлар амалга оширилди. Соғлом оила қуриш, соғлом фарзандни дунёга келтириш, соғлом турмуш тарзини тарғиб этиш мақсадида тушунтириш ишлари, очиқ мулоқот, сайёр қабул ва давра суҳбатлари ўтказилди.
Марказнинг шаҳар ва туман бўлимларида малакали, катта ҳаётий тажрибага эга бўлган 37 нафар олий маълумотли ходим иш олиб бормоқда. Яқинда шаҳар ва туман бўлимларига Spark автомашиналари топширилди.
Вилоятда оғир турмуш шароитида яшаётган 5 мингдан зиёд хотин-қиз рўйхатга олинган. «Оила» марказининг ҳудудий бўлимлари томонидан уларга ҳар томонлама кўмак кўрсатилмоқда. Шу кунга қадар 1 минг 788 нафар ана шундай хотин-қизга тиббий ёрдам кўрсатилди, 904 нафарининг бандлиги таъминланди, 154 нафарига уй-жой берилди. 473 нафари уй-жой олиш учун тавсия этилди.
Изоҳ (0)