Жиззах вилоятининг Арнасой туман прокурори ўринбосари Дилшод Каримов 16 сентябрь куни соат 17:30 атрофида Nexia автомобилини «Жиззах—Учтепа—Навбаҳор» автомобиль йўлининг 16-километрида бошқариб бораётганида ЙТҲ содир бўлди. Бу ҳақда Бош прокуратура матбуот хизматига таяниб, «Халқ сўзи» хабар берди.
У йўналиши бўйлаб ўзининг ортидан ҳаракатланиб келган Daimler Benz 210 русумли автомашина ҳайдовчиси Ж. йўлнинг қарама-қарши томонига чиқиб, уни қувиб ўтиб, кескин тормоз берган ҳолатда, уни тўхтатишга ҳаракат қилиб, Д. Каримовни йўлда ҳаракатланишига тўсқинлик қилганлиги сабабли, Д. Каримов бошқарувини йўқотиши натижасида йўлнинг чап томонида жойлашган уйларнинг йўлагига чиқиб кетган ва йўлакда ҳаракатланиб келаётган пиёда Г. Эгамбердиевани уриб юборган.
Фуқаро Г. Эгамбердиева олган тан жароҳатлари оқибатида Республика шошилинч тиббий ёрдам илмий маркази Жиззах филиалида вафот этган.
Судга оид тиббий экспертизанинг бирламчи хулосасига кўра, марҳума Г.Эгамбердиевага етказилган жароҳат оғирлик даражаси бўйича «ҳаёт учун хавфли бўлган» тан жароҳати, деб баҳоланган.
Д. Каримов «бош мия чайқалиши, пешона соҳаси тирналган тан жароҳати ва ўнг елка чиқиши» тан жароҳатлари билан марказнинг Жиззах филиали нейрохирургия бўлимига ётқизилган.
Мазкур ҳолат юзасидан вилоят прокуратураси томонидан жиноят иши қўзғатилган. Жиноят иши бўйича дастлабки тергов ҳаракатлари вилоят прокуратурасининг 18-бўлими томонидан олиб борилмоқда.
Изоҳ (0)