Бухоро вилоятининг Когон шаҳрида 14 сентябрь куни шаҳар ИИБ ходими ўз раҳбарига ахборот бериб, унда бир фуқаро унга пора таклиф қилаётганини маълум қилган. Бу ҳақда Ўзбекистон ИИВ Жамоатчилик ва оммавий ахборот воситалари билан алоқалар бошқармаси хабар бермоқда.
Маълум бўлишича, 9 сентябрь куни муқаддам судланган фуқаро У.С. Когондаги ошхоналарнинг бири олдида фуқаролар билан жанжаллашган. Бу ҳолат бўйича милиция ходими ундан тушунтириш хати ёзиб беришни сўраган, У.С. эса ишни қонуний чора кўрмасдан ёпишни сўраб, эвазига 500 минг сўм пул пора сифатида таклиф қилган.
«Мазкур ахборот юзасидан вилоят ИИБ ва вилоят прокуратураси ходимлари томонидан ўтказилган тезкор тадбир натижасида У.С. ходимга хизмат хонасида 500 минг сўм пулни пора сифатида бераётган вақтида тадбир иштирокчилари томонидан ушланган», — дейилади ИИВ ахбороитда.
Хабар беришларича, ушбу ҳолат юзасидан жиноят иши қўзғатилиб, тергов ҳаракатлари олиб борилмоқда.
Изоҳ (0)